FA Cup-ah offside technology thar enchhin dawn

FA Cup-ah offside technology thar enchhin dawn
Football-a sawi hlawh reng leh harsatna sutkian harsa tak pakhat chu offside chungchang hi niin, FIFA World Cup Qatar 2022 Group E match pakhata Spain leh Germany intum tum pawh khan Germany player Antonio Ruediger-a goal lawm kha a hnuah offside vangin a lunghnur leh a, tun thlengin inhnialna chhuah tamna pawl tak a la nih zui zel avangin dik zawk leh felfai zawka offside manchhuahna khawl thar semi-automated offside technology an tih chu an siamchhuak leh tawh a, English football-a a vawikhatna atan FA Cup-ah an enchhin dawn.
He technology thar hi thla thara FA Cup fifth round match sarih an khelhna tur Premier League stadium hrang hrangah an hmang chhin dawn tih karliamta khan FA thuchhuah chuan a tarlang a; fifth round game riat an khelh tur zinga Preston North End leh Burnley inkhel tur chu Premier League team tel lohna awmchhun a nih avangin he game-ah hi chuan khawl thar hi an enchhin ve dawn ta lo a ni.
Semi-automated offside technology an tih hi kumin Krismas hmaa enchhin tum tawh kha an nih laiin test kawngah harsatna an han tawk leh rih a, thla thar hi an tinzawn leh ta zawk a ni.
FA thuchhuah chuan, “Kan technology thar hi Emirates FA Cup fifth round lama enchhin tum a ni a, a test hun hi 2024-25 season tih a nih laiin kan tum aia tlaiah kan enchhin thei zawk dawn ta a ni.
“Emirates FA Cup lama hlawhtlinna kan hmuh hnuin tun season chawhnu lam hian Premier League lamah pawh enchhin zui leh a ni ang.
“Semi-Automated Offside Technology hian hmasawnna min thlen ngei kan beisei a, supporter-te tan pawh tawnhriat phurawm tak a ni ngei ang,” tiin an sawi.
Video Assistant Referees lam pawh FA Cup fifth round mach zawng zawngah hian la hman chhunzawm zel a ni dawn a, stadium chhunga aurinna hmangin VAR thupuan hriat tur pawh a la awmchhunzawm ang a, referee-te’n fans leh inkhel thlirtu zawng zawngte hriatah an thutlukna siam dan an la sawifiah zui zel dawn a ni.
FA Cup fifth round match-ho hi March ni 1 atanga khelh tura ruahman niin, Premier League tem ve ve intumna tur match hi a awm.