Faina hnatlang: A lera \huai?

Thing hi a lera thuai hi chuan a thi mai lova, thenkhat phei chu a tawi-buk zual sauh a; thing ti thi tur chuan a zung lam beih hmasak a ngai thin.
Tun lai hian, “Save the Riparian” an lar hle. Tlawng lui fintu kawr tihfai hnatlang an nei a, ni 20 zet an thawk a, an hnathawh hi a ropuiin an fakawm hle mai a, kawng hrang hranga hnatlangte lo tawiawmtute pawh an fakawm takzet; rah tha tak a chhuah ngei beisei ila.
|hahnemngai taka hnatlang kan han thawh chhuah hian, hnatlang kha a tha lo emaw, a sawt lo emaw tihna ni lovin, kan hnatlan chhan ber kha hnatlang tluk tluk ngai lo turin eng tin nge kan tih reh ang, tih lam ngaihtuah tel a nih loh chuan, ‘hnatlang, hnatlang, hnatlang…’ a ni reng mai dawn tihna a ni a, hmasawnna awm si lovin kan hah em em reng mai dawn tihna te pawh a ni thei awm e.
Lui fintu kawr hrang hrangah hian eng vanga bawlhhlawh chi hrang hrang lo awm ringawt nge tih hi kan hre tlang vek a, inzawh buai ngai lova kan chian tlan thil a ni. Chuti a nih chuan, eng tin nge, Lui fintu kawrah hian bawlhhlawh a luh khawm loh theih ang, tih harsatna hi kan sutkian (solve) tur ber chu a ni.
Tunhmain khawlaiah zurui an lal em em a, mi an ti ralti a, an pawt buai a, an insual a, nunau thlabarin an awm phah a, khawlaiah leng chhuak tha ngam lovin mipui an tawmim thin. Zu ruia buaina siam thinte nge tam zawk, buaina siam lote? tih zawhna atangin a solution chu a lo chhuak mai. Mi tlemte-in mi tam zawk harsatna an siamsak thei kha a dik lo a ni. Tun hnuah hi chuan a tam zawk zu in ve ngai loten khawlaiah ro kan rel thei ta. Zu ruiin buaina an siam ngam ta lo, pahnih khat te chu an lo awm ve zauh mahna; chu chu sawi tham a ni lo ang. Tunah pawh hian, kawr vela bawlhhlawh paih thinte hi a paih ve lote aiin an tlem daih ang; chung mite avang chuan kan phek buai thin a ni.
Bawlhhlawh thianfaia hnatlan mup mup hi a tha em em a, a aia tha chu bawlhhlawh thenfai tur awm lo tura hnatlan hi a ni awm e. YMA-in ruihhlo do beihpui a thlak ang deuh khan, bawlhhlawh do beihpui te hi thlak ni ve leh ta se, hma kan sawn phah ngeiin a rinawm.
Tuna kan kalphung hi chu a ler lama thuai ang deuh a ni a, a zûng/bul lam rep ro tura tanlak thar leh hi kan mamawh chu niin a lang.