Fainaa lawmman dawngte hnenah an lawmman hlan

Lunglei Municipal Council (LMC) chuan March 15 khan Mizoram Cleanliness Competition 2023-a lawmman dawngte hnenah lawmman an hlan.
Hmanpuitu UD&PA minister K Sapdanga chuan rilru atanga a lo pian loh chuan a fai ngawt theih loh a, mihring rilruin bawlhhlawh a ngaimawh lo chuan khawlai a bawlhhlawh mai a, a ngaimawh chuan kan khawlai atangin a lang mai, tiin a sawi.
LMC-ah Lunglei mipuiin ZPM party chu full mark an pe a, chu meisi chu Zoram meipuiah a chang ta a, kalphung thar- mipui sawrkar a lo piang thei ta tih sawiin, LMC councillor-te chu Lunglei khawpui enkawl tura mipuiin an thlantlin an ni a, engemaw avangin, kum khat dawn engmah hmanrua nei lo leh hna thawk thei loin an awm tawh a, councillor-te hnathawh chakin, za zek zekin an awm tawh tih a sawi.
“Tunah chuan hnathawhna tur hmanrua kan pek tawh dawn avangin mipuiin eng ang councillor nge kan neih tih kan hre tan tawh dawn a. Budget Session hmasa berah LMC enkawlna tur budget thahnem tak pek an ni,” K Sapdanga hian a ti.
Minister hian Pukpui khaw daia Solid Waste Management Centre (SWMC) dinna tur hmun a tlawh a. He hmun hi LMC chairman Lalzuithanga fapa Lalruatfela’n a ram a thlawna a pek a ni.
Lunglei High Powered Committee (HPC) office pawh tlawhin, HPC vice chairman V Malsawmtluanga leh thawktu dangten an lo dawngsawng. Sub-Hqrs YMA Lunglei hruaituten Lunglei Traffic Police Branch puitling din tul zia leh raltlante awmdan tur mumal zawka ruahmanna siam a tul zia an lo thlen bawk.