FCAA-ah state remtihna loin central-in thu a nei ngawt lo – ZPM Thalai
Forest (Conservation) Amendment Act 2023 adopt chuan ram hralhna lam a kawk loa, state/UT sawrkar rawn leh pawmpui lohin sawrkar laipuiin hma la in thu a rawn nei ngawt thei lo tih ZPM Thalai chuan an sawi.
ZPM Thalai Hqrs. thuchhuak chuan, FCAA 2023, sub section (2) clause (c) subclause (i) ah ram tana project pawimawh emaw ram humhimna thilah chuan international border, line of control emaw line of actual control atanga km.100 bialah project construction atan exemption a pek thu a inziak a, no.(ii) ah paramilitary-te tan hectare 10 thleng exemption a pe bawk tih a sawi.
He Act hi Bill a nih lai khan, hman a nih dan tur rules leh guidelines siam a awm loh avangin Mizoram tan a him lo thei nia hria in, ZPM party pawhin na takin a dodal tih a sawi bawk.
2023 November 29-ah sawrkar laipuiin he dan hman dan tur rules & guidelines chu gazette notification a chhuah a, Act a tarlan km.100 biala project exemption leh paramilitary-te tana exemption hman a nih dan tur a rawn sawifiah a, international border atanga km.100 bialah hian he dan hian central hi thuneihna tawp a pe loa, state leh UT sawrkar rawn leh pawmpui a ngaih thu a inziak tih a sawi.
‘He gazette notification hian Mizoram hralhna lam a kawk lo a. Tuna ram hruaitute kutah hian Mizoram hi a him tawk a ni,’ a ti.
FCAA 2023-a rules & guidelines-in state thuneihna chhuhsak a nei loa, state leh UT sawrkar chu thuneihna sang zawk a pe niin ZPM Thalai thuchhuah hian a sawi a. Exemption area-a approval chungchang pawh State Forest department atanga regional, regional atanga central approval rei tak tak nghah ngai tawh loin, exemption area-a project pawimawh bikah state kutah thuneihna sang tak – principle approval leh final approval a pe zawk tih a sawi a ni.
‘FCAA avang hian Mizorama forest area, boruak mela teha international border atanga km.100 bialah hian sawrkar laipuiin thuneihna pumhlum a nei loa, Mizoram sawrkar berawn loin eng project mah kalpui theih a ni lo tih hi Zoram mipui kan chah a ni,’ a ti.