FCI-in thla 4 chhung daih buhfai dah khawl sa a nei

FCI-in thla 4 chhung daih buhfai dah khawl sa a nei
Food Corporation of India chuan Mizoramah thla chhung vel daih buhfai dahkhawl sa a nei a, buhfai tam zawk dahkhawl thei turin kudam an sak belh mek.
State Consultative Committee of FCI Mizoram chairman, Rajya Sabha MP K Vanlalvena sawi danin, ration card awm atanga chhuta Mizoram-in thla khata buhfai a mamawh zat chu metric ton 5479.833 a ni a, tuna FCI-in Mizoram hmun hrang hranga an kudam-a buhfai stock a neih zat chu MT 21132 niin, hei hi thla khata buhfai mamawh zat atanga chhut chuan ni 115 daih a ni.
Buhfai hi rel hmangin Bairabi thleng chauh lakluh theih a la nia, Railways lamah Sairang thlenga phurh luh theih turin FCI chuan a dil mek a, chumi inbuatsaihna atan Sairangah MT 5000 leng kudam an sa zo tawh a, MT 10000 leng sak mek ni bawkin, peihfel a nih chuan Mizoram-ah kudam 8, MT 41842 leng a nei tawh dawn a ni.
Kum 2025- 2025 chhung khan FCI hian Mizoramah rel hmangin buhfai MT 113820 a phurlut a, hetah hian rel kawng chhia avangin 2025 September thla pum phurhluh theih a ni lo. Sawrkar kum kal mek, 2025- 2026 ah February thleng hian MT 96842 an phurlut tawh.
FCI hian Mizoram tan buhfai tam zawk a chah belh thei reng tih State Consultative Committee chairman hian a sawi a. Buhfai certified, quality tha zawk a chah theih laiin, sawrkar chuan open market atangin buhfai man to zawk leh certified ni lem lo a lalut reng a; Mizoram mamawh zawng zawng chu FCI hian phuhru pha chiah lo mah se, state sawrkar tan sum engemawzat hum theihnan lak belh sak se sawrkar tan a hlawk zawk dawn tih a sawi a ni.
Bairabi thleng rel hmanga buhfai an phurhluh, Mizoram hmun danga an phurh chhuah lehnaah unload/ load hna thawktu mihring leh truck an indaih lo reng a; kawng chhia avangin harsatna an tawk thin tih a sawi bawk.