Fernandez-a season a zo

2023 winter transfer window inhawn laia Benfica atanga pound maktaduai 107 tehrenga Chelsea lamin an sengluh Enzo Fernandez-a thal bawr hliam chu hlawhtling takin zaisak bawk mah se tun season kal laiah west London club tan a inlan hman tawh dawn lo.
Chelsea midfielder Fernandez hi tunah kum 23 mi lek la ni chungin Argentina national team-ah player langsar a ni der tawh a, mahse, hetia inzaina chemte a hmachhawn leh tak rih avangin 2023-24 season tawp lama Premier League game ruk khelh tur la awmah khelmuala lutin club a tanpui thei dawn tawh lo.
Argentina international hian June ni 20 atanga khelh tan tura ruahman Copa America lamah erawh a inlan hman tawh a beisei thu a sawi.
Tarlan tak angin, Benfica atanga Chelsea a zawmna man kha tun thlengin British record a la ni a; an ramin 2022 World Cup trophy an sualchhuah tuma young player of the tournament atana an thlang khan football bazar lamah a dinhmun a chawikang dawrh a ni.
England a thlen hnuah hliamin a tibuai zui ta tlat a, season kal laiah hian Blues tana match 40 a khelh tawhah goal sarih chiah a la khung tling.