Ferrari zawm tur Hamilton a hlim

|um sarih lai Formula One world champion ni tawh Lewis Hamilton chuan nakkum atangin Italian team Ferrari a zawm dawn tih tarlan a ni tawh a, a team thar tur chungchang sawiin Briton chuan a naupan lai atanga a lo mangphan tawh thin duhthusam puitlinna tur a nih thu a sawi.
Mihang driver ropui chuan mi thenkhatin a insawn hun tur chu hrethiam lo mah se a tan chuan insawn hun dik tak a nih thu leh hun remchang dang a zuan thei tur a hlim takzet thu sawi chungin Ferrari car sen lar vat mai khalh chu naupang a nih laia a tum ber thin a nih thu a tarlang tel.
December 2021 kha Briton kuta F1 title luh tawpna ni rihin, kha hnehna kha he sport-a driver hlawhtling ber nihtirtu a ni a, grand prix race-a chak tam ber niin race 103 a chak tling tawh bawk.
Karliamta Ningani khan Formula One khawvel nghawr-nghing dawt tham thuchhuah siamin, kum 2025 atanga intanin Ferrari-a kum tam deuh zawk daih tur contract ziah a remtih thu a puang a; kartawp Inrinni khan kum 39 mi hian Instagram thutlukna dik a siam nia a hriat thu a sawi.
Kum 2012 tawp rual khan Hamilton hian McLaren chhuah-sanin Mercedes a zawm a, kum thar atang chuan British team chhuahsanin Italian team a zawm dawn ta a ni.
A team vawn lai a kalsan tur chungchangah Hamilton tawngchhuakin, “Kum 13 mi lek ka nih lai atanga ka hringnuna hmun lian tak luahtu Mercedes kalsan tura thutlukna siam hi ka nuna thutlukna siam harsa ber a ni,” a tichhuak hial.
A team thar tur Ferrari hian kum 2007 atang khan drivers’ title an la chang leh ta lo vang vang a; khami kum khan Hamilton hian McLaren-ah bul a tan ve chiah a, point khat lekin cham-pion nihna a chang pha lo!
Kum 2008-ah McLaren vuan chunga a Formula One world title hmasaber a hlawh-chhuak a, a hnu lama title dang paruk lakte chu Mercedes behchhan vekin a ni thung.
Briton hian nakkum atanga a zawm tur Ferrari tana inelna a hmachhawn thei tur chu a naupan laia a duhthusam puitlinna ti bawk mah se tun dinhmunah erawh kum 2025 lam a ngaihtuah loh thu sawi chungin season thar intan tur lama a rilru a sawrbing leh mek thu a sawi a, hun dang zawng aia a fit thu leh a phur thu sawi chungin a chhuahsan hmaa vawikhat tal hnehna chang chunga Mercedes puih leh a duh thu a tarlang tel.
Season khat chhunga intlansiak tam ber tur record 24-race season chu kumin March ni 2 hian Bahrain lamah an tan dawn a ni.