Firfiak chet hnuah J&K khual- zin hmunte hawng leh tan dawn

Firfiak chet hnuah J&K khual- zin hmunte hawng leh tan dawn
April 22-a Pahalgam-a mi firfiakten mi 26 an thah hnu thla hnih a tling tep tihah Jammu & Kashmir Lt Governor Manoj Sinha chuan Thawhlehni atang hian an union territory-a khualzinte tlawh thin hmunte chu a tahtawlin an hawng leh tan dawn tih a sawi.
Pahalgam bul, Baisaran hmun mawi taka mi firfiakte an chet hnuah khan he hmun leh Jammu & Kashmir-a khualzinte tlawh thin hmun, huan leh len khawthawnna lar tak takte chu a zavai deuhthawin invenna atan khar a ni.
“Invenna atana Kashmir & Jammu Division-a khualzinte tlawh thin hmun thenkhat chu hawng tan leh turin thu ka pe a. Pahalgam-a Betab valley leh lenkhaw thawnna hmun te, Verinag Garden, Kokernag Garden leh Achabal Garden te chu June 17 atanginh kan hawng tan leh dawn a ni,” tiin Sinha chuan X-ah a tar lang.
April 22-a mi firfiakte chetna khan Kashmir phaikuama khualzin a nghawng na hle a, Jammu-a Ma Vaishno Devi temple tlawha biakzin pawh an tlem phah hle bawk.
Hemi hnuah hian Jammu & Kashmir sorkar chuan miin an tlawh leh duh theihna tura tan lain an him a ni tih lantir tumin an bei nasa hle a. Thla hmasa khan a him tih tihlan nan Chief Minister Omar Abdullah chuan Pahalgam-ah cabinet meeting a ko hial a, firfiak chetna avanga khar, Betab Valley a tlawh bawk.
Cabinet thukhawm hian khualzin tlawh thin hmunte chu hawn leh thuai ni se ti mah se lieutenant governor-in a pawmpui mai loh avangin hawn har hret a ni.
Tun hnai khan Kashmir leh India hmun dang inkalpawhna thar, Katra-Srinagar Vande Bharat rel chu Prime Minister Narendra Modi-a’n a hawng a, hei pawh hi khualzin hipna pakhat a tling thei a. Thuneitute chuan rel chuan tum hian an inchuh nasa hle niin an sawi a, ni 10 lo awm leh tur chhung ticket a zo vek tawh niin Pathianni khan an sawi.
He ral hian khawvela rel kawng lei sang ber, Chenab bridge pawh a zawh a, hemi hmuh châk khualzin tam tak a hip phah a ni.