Firfiak donaa a thlawp avanginIndia-in US lawm thu hrilh

Firfiak donaa a thlawp avangin
India-in US lawm thu hrilh
Defence Minister Rajnath Singh-a chuan Thawhlehni khan US Defence Secretary Pete Hegseth biain India-in firfiaka chetna a dona kawnga US-in tiam chin awm lova a thlawp tlat avangin lawm thu a hrilh.
Phone-a an inbiaknaah Singh leh Hegseth te hian thil hrang hrang zau takin an sawi dun a. Ram venhima kawnga hun rei daih zawk thawhhona tur pawh an sawi a, heng zingah hian sipai inzirtirna leh thiam thil inpek tawn te, hmanraw siamna lama thawhhona te pawh a tel.
“India leh US-in ram venhimna kawnga thawhhona kan neih sa mekte thui tak thlirin kan sawi dun bakah thuk zawka kan inkungkaih dan tur te, kan inzawmna tihngheh dan turte kan sawi dun a ni,” tiin Singh-a chuan social media-ah a tar lang.
“India-in firfiaka chetna kan dona kawnga US-in theihtawp chhuaha tiam chin nei lova min thlawp tlatnaah lawm thu ka hrilh nghal a. A rang thei ang bera hmaichhana inkawm pawh kan châk tawh hle a ni,” a ti bawk.
Defence ministry chuan Singh-a leh Hegseth-a inbia hian kawng hrang hranga inhriatthiamna nei tawna an hlawkpui ve ve theih tura thawhhona tha siam zel ni se an ti tih an tar lang ve bawk.
“Hruaitu pahnihte hian kawng hrang hranga thawhho theihna turin beihpui thlakho te, ram venhimnaa atana industry-in a mamawh inpek tawn te, hmunhma inhrilh tawn te, sipai nunchan zirho te leh kawng dang danga tanho zel ni se an ti a ni,” tiin ministry chuan thu a chhuah.
Hegseth-a hian Singh-a hi US tlawh tura sawmin hmaichhana inkawm a duh thu a hrilh a ram venhimna kawnga thawhhona tur a taka sawi dun ni se a duh tih ministry chuan a sawi.
Tun tum hi kumin January atanga Singh-a leh Hegseth-a te telephone-a an inbiak vawi thumna a ni tawh.