Flight attendant Singson-i ruang finfiah, Manipur panpui

Flight attendant Singson-i ruang finfiah, Manipur panpui
Kar kal ta Ningania Ahmedabad-a Air India Boeing 787-8 Dreamliner tlaa Manipur mi flight attendant pahnih thi zinga pakhat zawk, Lamnunthem Singson-i ruang chu DNA sample lak hmanga finfiah ani ta tih a chhungten an sawi.
Singson-i ruang hi Ahmedabad atangin Dimapur, Nagaland-ah luhpui phawt a ni ang a, lirtheiin km 165-a hla, Manipur-a Kangpokpi-a an in luahah phurh luh a ni ang.
DNA sample a inmil hnuah a chhungte chuan Ningani tukah Dimapur thlenpui turin hma an la nghal a ni.
Singson-i te chhungkua hi tun hmain Imphal-a Old Lambulane-ah an cheng thin a; mahse, May, 2023-a chi leh chi inkara buaina a chhuah hnuah khan chhuakin Kangpokpi district-a internally displaced person (IDP) awmna hmunah an awm.
Manipur mi, flight attendant thi dang hi K Nganthoi Sharma niin Thoubal district-a cheng a ni a, a ruang finfiah theih a la ni lo.
Manipur sorkar chuan Thawhtanni khan flight attendant pahnihte hi Imphal tumhmuna hmuah tumin ruahmanna an siam tih sawiin chawimawina sang ber nena lo dawnsawna him taka phurh haw a nih theihna tur an ngaihtuah tih a sawi.
Imphal-a mipui pawl hrang hrangte chuan Singson-i ruang hi him taka tumpui a niha an khua pawh zalen taka panpui a nih theih nan lo pui turin a ngen a. Hetih lai hian news website The Print chuan a nupa (cousin), N Kipgen chuan Imphal-a phurh luh aiin kawng hla zawk, Dimapur kaltlanga phurh an duh ta zawk tih as awi.
“Ka farnu ruang hi politics khelh nana hman ka duh lo va, thuneitute hnenah chhungkuain kan duh angin Dimapur kaltlanga phurh kan dil a. Imphal kaltlanga phurh luh hi kawng tam takah him lo thei a ni,” tiin Kipgen-a hian a ruang finfiah a nih hma khan a lo sawi tawh a ni.
Kangpokpi-a mipui pawl hrang hrangte chuan Kuki Students’ Organisation member-ten a ruang hi Dimapur tumhmuna hmuak tur leh National Highway 2-ah Kangpokpi thleng kalpui se an ti.
Kangpokpi-ah hian town committee chuan human chain siama bati chhiin an in thleng an inzar pharh dawn bawk a ni.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More