Football result thenkhat thlirna

Football result thenkhat thlirna
International break neih a nih hnuin karliamta kartawp Zirtawp, Inrinni leh Pathianni khan tualchhung league hrang hrang khelh tan leh a ni a, kartir Thawhtanni AFC Champions League inkhel telin football result langsar thenkhat thlirho teh ang.
AFC Champions League
Pune khawpuia Balewadi Stadium-ah Mumbai City FC chuan Thawhtanni zan khan AFC Champions League match khelin debutants Nassaji Mazandaranan mikhual a, Iran team lakah MCFC hi sihnih faiin an tlawm!
Mikhual chakna goal hnih hi Ehsan Hosseini (34th minute) leh Mohammadreza Azadi (62nd)-te khung niin, ISL club-in Group D bul an tan fuh lo.
Riyadh khaw lama inkhelah Neymar chuan Saudi Pro League club Al-Hilal tan a vawikhatna’n starting line up a chang a, an mikhual Uzbekistan team Navbahor lakah a club thar chakpui zo loin 1-1 draw nen tha fahran loin Mizo player-te hmachhawn theih tur Neymar-a team-in Group D bul an tan ve bawk.
English Premier League
Inrinni zana West Ham United an hneh tumin Manchester City forward Erling Haaland chuan an goal thumna a thun. Haaland hian season tharah goal sarih a tilut tling leh der tawh a, Premier League a khelh hnuah goal 43 khawl tling tawhin, EPL-a a inlan ve hnua Chelsea team pumpuiin goal an thun zat a nihrual! Norway international Haaland hian City tan inelna hrang hrangah goal 59 a khung tling der tawh a, Chelsea erawh chuan goal 56 chiah an la thun ve thung.
London club lian Chelsea an chechhe tluang a, season tharah vawinga khelin, goal nga chiah an la thun! Hei hi kum 1995-96 hnu lamah EPL-a bul an tan chhiat ber tum a la ni.
Inrinni zan khan Manchester United chu Old Trafford-ah an mikhual Brighton hneh loin an tlawm! Brighton hian Old Trafford-a EPL khelh 20 chhung zet tlawm nei lo United hi 3-1 laiin an hneh a, an kaltluang lai an tihtawpsak.
Inrinni zan Premier League inkhel dangah Liberpool chuan 3-1-in Wolves an hneh ve bawk. He inkhelah hian Mohamed Salah chuan assist vawi nih a siamchhuak tling. Egyptian Salah hi goal thun leh siamchhuah kawngah vawi 201 a inrawlh tling chiah a, Liverpool tan EPL-ah Salah aia goal thun leh siam lama thawhhlawk awmchhun chu Steven Gerrard chiah kha a ni.
Inrinni zan vek khan Tottenham chuan an mikhual Sheffield United lakah 2-1 hnehna changin, Spurs manager thar Ange Postecoglou hian home record a nei tha viau a. north Londoners a enkawl hma leh hnu home-ah bik khelh 50 chhung zet tlawm a nei lo a, vawi 42 zet chak zawkah a team a tanpui nghe nghe.
Spanish LaLiga
Inrinni zan khan FC Barcelona chuan an mikhual Real Betis chu 5-0 ngawtin an hneh.
An muala awlsam taka an chak tum hian Ferran Torres chuan free-kick a pet goal a; Torres hi Lionel Messi awm loh hnuah Barca tana free-kick pet goal leh thei hmasa ber a ni. Argentine Messi free-kick pet luh hnua free kick pet goal leh turin Catalan team hian ni 866 zet an nghak!
Pathianni zan khan Real Madrid chuan Santiago Bernabeu-a an mikhual Real Sociedad chu 2-1-in an hneh ve bawk.
Manager tawnhriat ngah Carlo Ancelotti chuan Real Madrid hi vawi 173 a chakpui tling ta chiah a, manager zingah Real chakpui tam ber dawttu niin, a chungah hian el phak rual loha Spanish giants chakpui hnem fal Miguel Muñoz a awm a, ani hian vawi 357 zet a chakpui hem mai a ni.
Valencia chuan an mikhual Atletico Madrid chu 3-0 ngawtin an sawp ve bawk.
Khelh 17 lai chak an neih theih loh hnuin Valencia an chak ve ta nge nge a, November 2014 hnu lama an muala an chaklehna hmasa ber a ni nghal bawk.
German Bundesliga
Zirtawpni zan khan Bayern Munich leh an mikhual Bayer Leverkusen-te chu 2-2-in an inhnehtawk.
Hemi tum hian Bayern forward Harry Kane chuan goal khat a thun a, England striker Kane hian club tan goal 300 a thun tling chiah. Club tana goal a thun tam zawk hi Tottenham Hotspurs tan a ni a, Spurs tana a goal thun zat hi goal 280 a ni.
French Ligue 1
Zirtawpni zan khan Nice chuan champion lai Paris St-German chu an tualzawl ngei Parc de Princes-ah 3-2-in an hneh nawlh!
Nice hi Parc de Princes-ah game 13 zet chak thei tawh lo an ni a, he muala an chak hnuhnun ber tum chu November 2009 daih tawh kha a ni.
Messi & Ronaldo
Lionel Messi chu kartawp khan club tan a inlan lo. An thiam puipa Messi tel loin Inter Miami hi Atalanta United lakah 5-2 ngawtin an tlawm a, hei hi Messi an neih hnua an tlawm lehna hmasa ber a ni.
Messi a inlan theih loh laiin Cristiano Ronaldo erawh Al-Nassr tan a khel tha chhunzawm thung. Al-Raed laka 3-1 hnehna an chan tumin Ronaldo hian goal a thun a, game li chhung goal thun zawn tawhin, season kal mekah goal sarih a tilut tling tawh a, Saudi Pro League ah top scorer a ni mek.
A hnuai chiaha hian Al-Nassr tana a khelhpui goal ruk thun tawh Sadio Mane a awm.