Forest bill thar dodal zel tum
Forest Conservation (Amendment) Bill 2023 chu Mizoram tan chuan ‘anchhe bill’ a ni tiin, he bill hi sut emaw tih danglam emaw a nih hma chuan Zoram mipui tang ho tlat turin an ngen tih PC party chuan an sawi.
PC vice president Lalrinmawii Fanai chuan thuchah siamin, Parliament Session neih meka ‘Forest Conservation(Amendment) Bill 2023 to North East(FCAB)’ an kaltlang pui chu Mizoram tan anchhia a ni tih a sawi. ‘He bill thil tum chu, kan ram chhung zawng zawng deuhthaw ah hian kan ram leilung leh ramngaw chungchangah keimahni’n thuneihna pakhatmah kan nei dawn lo tihna a kawk a; hei hi thil pawi tak Mizoram tan anchhia takmeuh a ni,’ a ti.
Bill pass-a exemption area an tih chu, he bill hian automatic-in local authority (state sawrkar tiamin) thuneihna laksakin sawrkar laipui kutah a pe tawp a. Mizoram chu thlai leh ramngaw leh nungcha atanga eizawng leh nung kan nih avangin he bill hian chung kan khawsak phung chu min khapsak vek dawn tihna a nih thu a sawi a. Mau pum khat sat tur pawhin sawrkar laipui phalna a ngai zel dawn a, kan ram tan chuan he bill hi pawm chi rual a ni lo tih a sawi.
Hetianga a ram leilungfaten kan ram leilung chhungah kut kan thlak leh humhalh theih lohna turah hian, sawrkar laipui chuan a duhsakte tan – sahuan siam, eco-tourism facility siam, telecommunications siam, mining thlengin phalna a pe thei dawn thung a. Chu’ngte chuan ‘forest conservation’ thil tum letling chiahin ramngaw an tichhe leh tho dawn tihna a ni tih Lalrinmawii Fanai hian a sawi.
Chu mai niloin, ram venhimna chhuanlamin Army leh Defence hmunhma pawh Mizoram chhung khawi hmunah pawh an siam thei ang, tih a nih lehzel avangin, a ram mipui leh sawrkarin engmah sawi theih kan nei dawn lo chu a lungchhiatthlak takzet tih sawiin, ‘He bill-a ram leilungfate tana kan ram leilung chunga mikhual chan channa tur ringawt hi engti kawng maha pawm theih chi ah kan ngailo a, he bill hian India hmarchhak state min nghawng vek dawn avangin, a huhoa a rang thei ang bera hma la turin inbuatsaih mek a ni a. Bill hi sut emaw tih danglam emaw a nih hma loh chuan tlawmngai pawl zawng zawng, kohhran pawl zawng zawng, political party zawng zawng leh Zoram mipui tangho tlat turin ka ngen a ni,” a ti