Lalnunmawia Pachuau
-- Advertisement --
Kan hriat theuh angin Mizoram chu tlang ram, leilung nghet lo leh leimin nasatna hmun, ruahtui tlak tam kumah phei chuan chhiatna nasa tak thlen thinna ram a ni. He ruahtui tamtak tla hian kan inkalpawhna kawngpui chhiathma nachhanah te hian mawh a phur nasa hle a ni. Fur laia leimin nasat vang leh kawngpui side drain te enkawl mumal a nih thin loh vangin kawngpuiah tuihawk nasa tak a luang thin a, hei hian kawngpui chhiatna a thlen nasa thin hle bawk. Kan kawngpui chhiatna chhan bulpui ber nia ngaih theih chu foundation awm lova kawng kan siam hi a ni.
Foundation nghet awm lovin kawng kan siam:
Indian Road Congress guidelines te, Central PWD Manual te, Road Construction project, Technical & Design etc., lam thil hi chu mipui nawlpui hian kan hrethiam lo a, kan hriatthiam zawng erawh a taka kan tawn leh kan experience atangin kan ram kawng dinhmun hi kan lo vei ve hle thin. A tlo lo em em a, kum 5 daih tha tak hi kan nei ngai meuh lo a, maintenance a hautak theih zia lah hai rual a ni lo. Hei tunah pawh kum rei lo te kalta a rulngân pa ang zara dum hlarh kan châk lakluhna kawngpui, Vairengte to Aizawl chu vawk kawng tum ang maia a chhiat vangin buaina nasa tak kan tawk leh ta a nih hi. Fur ruahtui dâwl zo tur kawng hi kan ramah hian a siam ve theih loh em ni le?
Kan naupan lai han ti ila, BRTF Kawng siam kha kan lo hmu fo tawh thin a, an ni kha chuan concrete/rigid structure kher ni lovin foundation kha nghet tha takin an siam thei a. Kawng leveling siamin a sir tawn tawnah lungchang phek an tung a, hei hi motor lianin kawngpui a rah pêr leh tawlh lohna tura foundation tikhawng turin a tangkai hle a ni. Tichuan foundation bulpui ber atan a tir berah Boulder lung lian, lu tiat rual chu uluk tak leh nghet takin an phah chhuak vek a, chu mi chungah kuttum tiat rual lung dah lehin a chungah rora an chap leh a, alkatra/bitumen-in an final ta thin a ni. Hetianga foundation tha tak nena kawngsiam hi a blacktop lo khawk mahse a khuar thuk thei lo a, maintenance thlengin a awlsam phah a, motor-in a tuar lo bawk.
Tun laia an kawng siam dan erawh leveling an han siam zo a, GSB, lui balu leh lung nawi an han chap mar a, a chungah rora leh bitumen nen a final mai thin. Foundation rintlak awm miah lovin kawngpui an siam tihna a ni. Hetianga foundation a awm loh vang hian Mizorama kan Highways te hi a chhe hma hle a, khuar thuk pui pui, patling kâwng chen laia thûka a khuar te a awm phah ta thin a ni.
Kawngsiam chungchanga an sawi fo chu Indian Road Congress-in hman lai BRTF kawng siam anga siam kha a phal tawh lo tih sawi te a awm thin. Indian Road Congress guidelines and manual hi kan ram leilungah hian a kawi a ngîla zawm diak diak chi a ni em? Kan ram leilung nghet lo tak mila kawngsiam dan ngaihtuah hi kan tan a pawimawh zawk tih hi kan hruaitu te hian ngaihtuahna seng ngun se a tha hle mai. Foundation tha tak nena kan ram kawng siam a nihna turin kan sawrkar te hian hma la se a duhawm hle.
Kan kawng siam danah hian a bultanna atana foundation nghet awm lo, boulder lung lian tha hmang lovin kan siam a, a chhiat hnuah boulder lung lian pui pui hmangin a siamthat hna kan thawk leh ang lawi a! Hetianga hma lak ai chuan kawng siam tan laiin foundation tha tak nen bul tan mai ni se, maintenance pawh a awlsam zawk ngei ang. Tuna kan ram kawngpui siam dan hi chu kan ram leilung nghet lo ah foundation awm lova siam a nih vangin a tlo thei lo. Lungpui chungah insa lovin tiau vaivut chunga insa ang mai kan ni e. Truck ke 12 nei, ton engemaw zata rit phur zo tur kawngpui foundation nghet taka kan siam a ngai.
Motor lian, ton engemaw zata rit rah turah chuan concrete structure/rigid pavement tlin lo mah ila, kan phak tawk mila foundation siam ve hi kan ngai a ni. Kan lung te hi a chang tawk lo tih hi chhuanlam a tling lo a, foundation tha awm lova kawng kan siam vang zawk hian a chhiat nasat phah hle zawk a ni.
Four Lane kal tur hi foundation tha tak nena siam ni se:
Tun dinhmunah Vairengte to Sairang hi Four Lane Project kal tura ruahman mek a ni a, hei hi a puitlin ngei han beisei ila. Hetih lai hian Four Lane hi kawng zauh (road widening) mai ni lovin kawng thar tur anga ruahman a nih vangin a kawngkal dan alignment leh zauh zawng tamtak tihdanglam a ni dawn a. Hemi kawng kal tur hi Foundation tha tak nena siam ni se a duhawm hle mai.
Tunah hian kan châk lakluhna kawngpui chhia hi Four Lane project kal tur khaihlak nen hian inzawmna an nei a. NHIDCL hian four lane kalpui an tum vang hian kawng hlui repair-na atana sum sên vak vak kha tul ber lo ah an ngai niin a lang. Four Lane kal turah alignment leh road leveling tamtak tih danglam a ngaih dawn vangin kawnghlui lo repair tluk tluk ai chuan kawngthar laih law law kha an tan chuan a thlanawm zawk a ni. Chuvangin Four Lane project a buai chhung chu kawngpui tha kan neih a rinawm loh.
Amaherawhchu, tun dinhmunah chuan Four Lane Project hi Forest Clearance vangin a buai mek tih chu kan hre vek ang a, kum rei tak mi sang tamtak lo inbeng bel tawh te chênna hmun, in leh lo ram te Forest area tia Forest Department lamin an claim luih tlat vangin NPV leh CA atan NHIDC-in Vaibelchhe engemaw zat an pek a ngai a, hetih lai hian mimal ramah Compensation an pek double a ngai bawk si a ni. Double payment hi NHIDCL hian an theih loh vangin he Four Lane project hi a buai chho ta a ni. He buaina hi engtin tak inchingfel ang maw? Four Lane project hi an cancel dawn nge, an kaltlangpui dawn lo thlir phawt mai ila.
Englekhawle, Four Lane pawh han kal se, tuna kawngpui an siam dan system hi chuan kum reilo te bak hi a daih leh lo ang tih a hlauhawm hle. Chuvang chuan kan State sawrkar pawh hian foundation structure tha taka an siam theihna turin implementing agency NHIDCL hi thawhpui dan kawng dap se a duhawm hle. Foundation awm lova kawngpui hi siam a nih leh chuan kum rei lo te ah kawngchhia, khuar thuk pui pui kan nei leh vat dawn tih sawi lawk tur hian Zawlnei nih kher pawh a ngai awm lo ve.