Four lane-a ram neituten MP inthlan boycott sawiri

Vairengte atanga Sairang inkar kawngpui, four lane-a sial turah helaia ram lak neitute chuan hna tan thuai an duh tih an sawi a. April 15 thlenga hna tan tura hma lak a nih loh chuan MP inthlan boycott thlenga hma lak an tum thu an sawi.
Sairang to Vairengte Four Lane Land Owner Association hruaitute sawi danin, Vairengte to Sairang four lane kawng kal tur hna tan theih loh chhan chu Forest department-in a contractor tur NHIDCL phalna an pe thei lo chu an hrethiam lo tih an sawi a. April 15 thleng sawkar nghah an tum a, a tul dan azirin election boycott thlenga hma lak an tum.
He kawng laih tur hi package 6-a then niin, package III, IV, V leh VI hi notification pawh chhuah tawh a ni a; package VII & VIII chu notification tihchhuah a la ni lo thung. Vairengte to Kawnpui package III-VI hi chu Forest department-in phalna an pek chuan laih mai theih a ni tih an sawi.
Forest department hian a tirah he kawng laih hi Road Reserve Forest (RRF) leh Riverine Reserved Forest (RRF) in a huam, tiin kawng laih tum hi a dodal a. High Court Single Bench chuan Forest department dodalna hi a hnawlsak. Hemi hnu hian NGO pakhat chuan High Court-ah appeal-in engemawchen chu ‘status quo’ a dah a ni a, an ni hi an inhnuhdawh leh hnuah High Court Principal Bench chuan 2021 January 22 khan court thutlukna hmasa chu a nemnghet leh a ni.
Cabinet meeting, Enforcement Committee leh sawrkar chuan High Court thu ang hian kal tur tih chu an thutlukna a ni . Forest department hian thing kih phalna notification a tihchhuah rualin laih phalna hi an pe duh lo tih an sawi. Land Owner Association chuan Forest department chhungah thil fel lo awma an ngaih thu an sawi.
Association chuan tunah hian kawng laihin a tihbuai tur chhungkaw 1700 chuang an awm a, an harsatna sawrkarin chinfel sak thuai se an duh tih an sawi a ni.