President Emmanuel Macron chuan France chuan Niger a sorkar sipai tena an paihtlak hnuah military lama thawhhona chhu chat vekin a sipaite pawh a la chhuak nghal ang tiin a sawi.
“France chuan a ambassador kohkir tur a ti a. Reilote chhungin ambassador leh diplomat tinte France-ah an lo let leh vek ang” tiin Macron chuan a sawi.
Military co-operation a tawp tawh tia sawiin French sipaite chuan thla reilote hnuah an chhuahsan vek ang tiin a sawi bawk.
July thlaa Niger-a thuneihna changtu military junta-te chuan France thutlukna siam chu lawmawm an tih thu an sawi zui a.
West African ramah hian French sipai 1,500 vel an awm mek a. Niger mipuite chuan sipai tena thuneihna an chan hnuah France sipai tena an thutchilh reng chu an duh lohna an lantir bawk a ni.
France hian Sahel region-ah Islamist militant-te beih nan berah Niger hi hmangin a inbenbelna a ni a. Macron chuan Niger President paihthlak tak Mohamed Bazoum chu hruaitu anga an la ngaih tlat thu a sawi zui bawk.
“President Bazoum chuan huaisen taka reform a kalpui avangin sipai ten duh lovin an paihthla a ni” tiin a sawi.
Niger hi West Africa-a French colony tam tak zinga pakhat niin August thla khan sipai ten thuneihna an chang zui a. A hma lawkin thenawm Burkina Faso, Guinea, Mali leh Chad-ahte pawh sipai ten civilian sorkar paihthlain thuneihna an lo chang tawh bawk a ni.
Hetihlai hian Sahel region-ah hian Russia-a Wagner mercenary-te chuan inbun ngheh tumin hma an la mek thung a, chu chu Khawthlang ram tena an ngaihmawh em em a ni thung.
Hetihlai vek hian regional Economic Community of West African States (Ecowas) te France-in a thlawpte chuan Niger-ah sipai chakna an hman mai theih thu leh Bazoum chu dah leh turin an ngen zui a ni.
France-in Niger chhuahsan dawn ta
Get real time updates directly on you device, subscribe now.
Prev Post
Next Post