French Open khel lo thut thei Nadal chak phawt
French Open khel lo thut thei Nadal chak phawt
Nilaini khan Rafael Nadal chuan mipa leh hmeichhia sawi loa grand slam tournament pakhata champion ngun ber record a lo siam tawhna French Open title 14 a lak tawh belhchhah turin kumin hian Roland Garros-ah a inlan lo mai thei tih a sawichhuak zauh a, a tuk, Ningani khan clay court grand slam inbuatsaihna Madrid Open first round-ah hnehna a chang zui.
Hliamin a tihbuai chhoh ve tak reng Spaniard chuan thla thara khelh tan tur French Open-ah a chhuak ngei dawn em tih a la sawichiang thei lo tih sawiin, “Vawiin hi Paris-a ka inlan hun ni ta se inkhel tura ka chhuah ka ring lo.
“100% fit chung lo chuan inkhelh luih chi-ah ka ngai lo a, mahse, ka tan a tawpna’na Madrid-a inkhelh hi a pawimawh tlat a, he court luh hi ka tan thil namen a ni lo a, tawnhriat ropui tak tak ka lo neih tawhna a ni,” tiin hnungzang hliam atanga kirleh Nadal chuan a taksa dinhmun a sawi.
Kum 37 mi chuan sawizawmin, “He thu ka sawi avang hian chawlhkar lo herchhuak leh tur hnaivaihoah hian engkim ka bansan dawn tihna a ni lo a, eng thil nge lo thleng zel dawn tih hi ka hre lo mai a ni.
“Paris-a inkhel tur chuan ka tih theih zawng zawng ka dapkhawm tho dawn a, ka inkhel thei a nih chuan ka khel ang a, ka thei ta lo a nih tak leh tihngaihna a awm lo a ni mai.
“Ka dinhmun a tha tawk em tih ngaichang chungin Paris chu ka pan phawt tho tho dawn a, inelna hmachhawn tura fit tawka ka inngaih chuan ka inkhel ang,” a ti.
|um 22 ngawt Grand Slam champion ni tling tawh Nadal hian Nilaini vek khan a khelh that theih dan ber hun ang kha a hlat rih hle tih tarlang telin, a mimal inpekna avang liau liauin a tuk, Ninganiah American rawlthar Darwin Blanch a hmachhawn phawt dawn tih a tarlang tel bawk.
2024 season tawp ruala a chawlh ve tawh a inrin thu lo sawichhuak tawh Nadal hian kum khat dawn khel bawr na avanga a chawlh hnuah kumin January thla khan Brisbane-ah inelna a hmachhawn a match hmasa pahniha a chak hnuin quarter-final lamah Australian Jordan Thompson a hneh ta lo a ni.
Chumi hnuah ATP event a han hawisan leh ren rawn a, karliamta khan Barcelona-ah kirleh hlawlin, first round-ah Flavio Cobolli a paltlang zet a, a tuk second round lamah 7-5, 6-1-in Australian fourth seed Alex de Minaur chuan a hnawtchhuak zui leh.
Rafael Nadal hian kumin bak inelna a hmachhawn theih tawh loh mai theih thu lo sawichhuak tawh mah se rei tak la inkhelh zui zel chu a duhthusam a nih thu tunhnaiah sawichhuakin, hun rei zawk khelmuala la inhamtan a duh chhan chu major title lak belh zel lam ai mahin a fapain tun aia tam hi court-a a chetla lai mitthla thei se a duh vang a nih thu a sawi.
“Nia, competitive khawvela la cham zui leh hlek ka duh chhan chu ka fapa hriatrengna khawlbawma inelna ka hmachhawn lai thunbelh hi a ni a, chu chu kei leh ka nupui bakah kan chhungkaw pumpui duhthusam a ni.
“Chu erawh ka thlentir zo kher lo mai thei a, mahse, team ropui tak ka nei a, ka hringnunah ka chhungte leh thian thate’n min thlawp tlat a, ka duhthusam hi puitlin zo lo mah ila ka lawm zel ang,” a ti.
Ningani khan fit pumhlum inti lo hle chungin a Madrid Open farewell tournament-ah Blanch a hmachhawn a, minute 63 lek chhungin American rawlthar kum 16 mi lakah 6-1 6-0 hnehna awlsam a chang a, a vawirukna atana Madrid champion nih a tum mekna kawngah bul a tan fuh phawt.
Barcelona Open second round-ah a hneh loh Australian Alex de Minaur lakah zanin hian fiahna lian zawk a hmachhawn zui leh ang.
Ningani vek khan women’s draw lamah world number one Iga Swiatek pawhin 6-1 6-4-a Chinese Wang Xiyu sawp chungin third round a lut.
American third seed Coco Gauff pawhin hnehna nuamsa changin Dutch player Arantxa Rus lakah 6-0 6-0 hnehna a sualchhuak a; Greek fifth seed Maria Sakkari paw’n 6-3 6-2-ih Croatia player Donna Vekic a sawp ve bawk.
Grand slam title pali lai hawn ve tawh Naomi Osaka erawh Russian 15th seed Liudmila Samsonova chuan 6-2 4-6 7-5-in a hnawtchhuak thung.