FUR TUILIAN LAKAH ENGTINNGE KAN HIM ANG?

Rev. Dr. Zaichhâwna Hlâwndo
Zofate kan chenna tlâng ramah hian ruahtui malsawmna kan dawng tam hle. Van ruah tla hian boruak nuam tak kum tluanin min pe tih mai tur a ni. “Hei ai ram nuam zawk hi awm chuangin ka ring nem maw” tih hla hi lo phuah loh phal chi pawh a ni lo. Pathian khawngaihna zarah ram hrang hrangah ka lo zin kual ve tawh a. Khawlum hreawm êm êmna te, khawvawt lutuk vurin a a khuh lûk reng mai ramah te pawh ka lo cheng ve tawh. Zofate chenna Zoram aia boruak thiang nuam, kum tluana khawvawt lutuk, tuar hreawm khawp emaw, khawlum lutuk tuar hreawm awm lohna hi khawvelah a vang khawp mai.
Chutiang taka Lalpan boruak nuam leh ruahtui malsawmna min pek ramah chuan ruahtui leh tuihawk avanga chhiatna rapthlâk tak tak erawh kum tin kan tuar ve thung. He fur ruahtui leh tui lian lakah hian engtinnge kan him theih ang tih hi beng sika kan ngaihtuah a hun hle. Hetiang harsatna kan tawh loh nan kan inven fim khur a ngai tak zet a ni. Sapho thufing chuan ‘Prevention is better than cure (Tihdam aiin inven fimkhur a pawimawh zawk) an lo tih hi kan mamawh chu niin ka hria. Kan inven fimkhur dan tura pawimawh ka tih te ka rawn tarlang ve dawn a. A taka chantir theitu sawrkâr leh mipuiten ngun taka kan ngaihtuah a kan bawhzui chuan harsatna leh manganna kan tawrh thin tam tak hi kan pumpelh theih ngei pawh ka beisei.
A hmasa berah chuan tui luan kawr tha kan siam a ngai. Ruah a lo sur tam chuan tuihawk a lo luang ta hum hum thin. Mihringin kan luah hma daih tawh khan kan chenna ram leilung a tui luanna tur kawr te hi Pathianin a lo duang vek a. Lei min vak vakte a awm ngai lo. Chuvang chuan leimin khuarel chhiatna tia kan puh mai hi a dikna chen a awm theih rualin khuarel chhiatna ai mah chuan hringrel chhiatna avanga lo awm thin a ni. Tui luanna thin pangngai ni lo kawngpui te kan sial a lo ngai a. Chu kawngpui kan laih chuan ruahtui tla chu a lo dawng khawl a, kawng sira tui luanna tur kan siam that loh avangin kawngpuiah tuihawk a luang ta chiam thin a. Chu chuan kawngpui a ti chhia a, lei min te a siam thin a ni. Chuvang chuan fur thlen hmain kawng sir tui luanna te hi uluk taka siam a, inhnawh phui laite a awm chuan thenfai hnatlang koh thin ni se. Khaw tin leh veng tinin mahni ram, khua leh veng tui luan kawr te uluk taka siam hnatlang neih thin ni se. Sawrkar, abikin Mizoram PWD pawhin hnapuiah nei se tuna kan harsatna tawh thin tam tak hi chu kan pumpelh theih ka ring. Lirthei khalhtute pawh hian kalkawng tui luang kan hmuh chu a theih hram chuan tlan pel mai lovin han siam rem mai theihte a nih chuan han din a, siam thin ni se. Sumo Service hote hian Bawngtuthlawhte pai ila, kawng sir tui luan kawr lo pingte pawh a har lutuk loh chuan Zofate tlawmngaihna dik tak khan passenger-te nen hnatlang zuai mai thin ila harsatna tam tak chu kan su kiang thei ang.
A pahnihnaah chuan leimin avanga harsatna tam ber chu kan in hmun laih kan fimkhur tawk loh vang a ni. Tlang ram lei nghet lo tak tak, engemaw hleka tawlh leh min mai thei tura ramah kan cheng a ni tih hi kan hriat a tul. Mahni duh duh hmun a mahni duh dana in sak mai te, in hmun laih mai te hi kan bansan a ngai. Tunlai khawvel changkang tawh takah hian mithiamte an tam tawh a. Sawrkar pawhin lei lam zirmi mithiamte pawh kan ruai a, hengte hi tangkai lehzuala hman thiam a tul hle. In sakna tura him lo tih hriat renga in sak tum tlatte hi khap ni se, in lo dinglai tawh pawh a him lo a nih chuan dan angin kalpui mai ni se. Nunna chan bawk in leh lo chan bawk, khawtlang mipui buai ngai bawk lakah kan him zawk ka ring. Midangte hmai zahna avang te, induhsakna tha lo tak avanga chhiatna rapthlâk tak thleng thei lakah kan fimkhur a, kan inven a tul hle. Zofate hian mite thuneihna leh thiltihtheihna dik lo taka hman loh kan zir zelte pawh a tul hle.
A tawp berah chuan ram hmangaihtu kan mamawh. Kan chenna tura hmun tha tak ram min petu kan Lalpa Isua Krista ngei khan “Thil siam zawng zawng hnena chanchin tha hril turin thu min pe a (Marka 16:15). Kan chenna leilung enkawl that hi kan tih tur, kan mawhphurhna leh chanchintha a taka kan hrilna tur a ni. Kan mamawh a tel lova kan nun theih lohna malsawm ruahtui min pekte lo dawnsawn leh enkawl te, a luan dan tur taka luanna tur siamsak hi kan bat a ni. Malsawm ruahpui rawn surtir rawh tia diltute hian malsawm ruahpui sur kan chhiatpui leh thin hi a dawhthleng kan siam rem tawk loh vang a ni thei tih hi kan hriat a tul tak zet a ni. Hawh u Zofate pianna ram Zoram nuam siam turin tan i la tlang ang u. Furpui eng ang pawh lo thleng leh se pheikhai ruala tan kan lak hmasak a, kan inven chuan hetiang rup rupa buaina te, thihna thleng thei lakah kan him zual ngei ang tih ka beisei.