G20 Summit-ah Xi Jinping tel dawn lo

Chinese President Xi Jinping chuan G20 summit-ah a tel dawn lo chiang ngei niin a lang a, Premier Li Qiang chuan a ai a awh dawn nia sawi a ni.
Russian President Vladimir Putin chuan Prime Minister Narendra Modi hnenah a tel loh tur thu tichiang tawhin Ukraine a ‘special military operation’ chu a thlurbing a ngaih thu a hrilh a ni.
Russian president hian nikum November thlaa Bali a G20 summit pawh a lo thulh tawh bawk.
Tun hmain hruaitu lawk tam tak te chuan G20 summit hi an lo thulh fo tawh thung a, an chhuanlam erawh a tha thin thung. India chu G20 president a nih mekna angin kumina annual summit hi September 9 leh 10 hian New Delhi-ah a thleng dawn a ni.
“Chinese President-in G20 summit hmang turin India a lo zin loh hmel” tia sawi niin Premier Li chuan Summit-ah China ai a awh ang tih a ni bawk.
President Xi chuan karleha ASEAN (Association of Southeast Asian Nations) leh East Asia summits neihnaah pawh a tel dawn lo tia sawi a ni bawk a.
“Media report thenkhatah hruaitu lawk thenkhatte chuan India rama G20 summit neih turah an tel dawn lo an ti a. Mahse, hei hi a thlengtu ram nena inkaihhnawihna nei lo a ni,” tiin official-te chuan an tarlang.
Premier Li chuan India chhuahsan hnuah East Asia summit Jakarata a neih turah a tel zui nghal dawn bawk a. Kum 2021 khan Chinese President Xi chu China a Covid-19 khuahkhirhna avangin Italy a neih G-20 summit-ah a lo tel tawh lo bawk.
Kum 2008 atang khan G20 physical summit hi tum 16 neih a ni tawh a, virtual summit tum khat kum 2020 khan Saudi Arabia thlenah neih a ni bawk a. Kum 2009 leh 2010 khan summit tum hnih neih a ni thung.
Physicial summit tum 16 neih zingah a hmasa pathum 2008 leh 2009 tih chauh loh chu kum 2010 hnu lam atangin tum khat chauh Heads of State (HOS) or Heads of Government (HOG) level tel kim biai tum khat chauh a la awm a ni.
Kum 2010, 2011, 2012, 2013, 2016 leh 2017 phei kha chuan G20 summit neihah HOS/HOG-level hnuai lam pakhat tal telna a awm ziah an ti bawk a. |um ngai lai HOS/HOG-level ram pahnihin an tirh a awm an ti bawk.
G20 hnuaiah hian global GDP 85% lawih a hauh a, global trade 75% hauh bawkin khawvel mipui hmun thuma thena hmun hnih lai a huam bawk a ni.
G20-ah hian Argentina, Australia, Brazil, Canada, China, France, Germany, India, Indonesia, Italy, Japan, the Republic of Korea, Mexico, Russia, Saudi Arabia, South Africa, Turkey, the U.K., the U.S. leh European Union (EU) te an tel a ni.