Gadar 2-in Rs 400cr a hnaih tawh

Bollywood film Sunny Deol leh Ameesha Patel channa ‘Gadar 2’ chuan Inrinni kalta khan cinema hall ticket hralhna atangin cheng vaibelchhe 32 a lalut leh a, tihian an tlangzarh atanga ni 9 chhungin India-ah cheng vaibelchhe 336.13 a lalut tawh a, khawvel huapin cheng vaibelchhe 395.1 a lalut tawh bawk. Pathianni cinema hall ticket hralhna nen chuan cheng vaibelchhe 400 a kai hman tawh ngei dawn a ni.
Gadar 2 hian Inrinni kaltaa cheng vaibelchhe 32 a laluh hi India-a film tlangzarh tawh zingah an tlangzarh atanga Inrinni vawi hnihnaa sum lalut hnem ber a la ni a, a hmaa he record siamtu chu Baahubali 2: The Conclusion kha niin, he film hian an tlangzarh atanga Inrinni vawi hnihnaah cheng vaibelchhe 26.5 a lalut a, he record hi Gadar 2 hian a rawn khum ta a ni.
Gadar 2 hian Pathianni-a cheng vaibelchhe 40 vel lalut leh turin an chhut a, heti a nih chuan India-a a lakluh zawng zawng chu cheng vaibelchhe 370 a tling thei dawn a, hetiang hi a kai thei a nih chuan Hindi film zingah India-a sum lalut tam pangana a ni dawn a ni. He film hi Shah Rukh Khan channa ‘Pathaan’ dawtah COVID-19 hripui len hnua Hindi film zinga sum lalut tam ber a ni tawh bawk.