Gandhi-a’n ‘thi’ tia voters’ list atanga paih mi pasarih kawm
Bihar-a special intensive revision (SIR) neihin ram chhung titi a luah mek laiin Rahul Gandhi-a chuan Nilaini khan voter list atanga ‘thi tawh’ tia hming a paih mi pasarihte a kawm a, ‘tawnhriat danglam bik’ an neihtir theih avangin Election Commission hnenah ‘lawm thu’ a hrilh.
“Tawnhriat ngaihnawm tak tak ka lo nei tawh a; mahse, ‘thi tawhte’ nena thingpui inho ang hi ka la tawng ngai lo. He ka tawnhriat danglam bik min thlentirtu Election Commission chungah ka lawm e!” tiin X-ah a tar lang.
Gandhi-a hian ‘thi tawh’ mi pasarihte nena an inkawmna, engtin nge Election Commission-in ‘a tihlum’ tih an hriat theih dan zawta a kawm lai minute li awh video a dah chhuak a. ‘Thi’ zinga pakhat chuan poll panel-in draft list a tihchhuaha tel lo nuai 65 zingah an tel tih an hria tih a sawi.
“Mahse, ka la dam a, ka la thi lo tih hrilh turin ka lo kal a ni,” tiin Gandhi-a hnenah hian a sawi a. “Panchayat pakhatah chuan ‘thi’ lo 50 vel an awm lo va, hetah an lo kal ve lo,” tiin a hrilh bawk a. Congress hruaitu hian mi dangte pawh hengho buaina ang bawk hian an buai tih a sawi.
“Heng mite hi Raghopur (RJD hruaitu Tejashwi Yadav-a bial)-a mite an ni a, tui a lian mek a ni,” tiin mipa pakhatin a sawi bawk a, putar kum 85 mi, ‘thi’ tia dah pawh a kawk bawk.
“Lehkha tihfel mumal awm lovin an paih ringawt mai a ni,” tiin hengho tawiawmtu party worker pakhat chuan a sawi a, “‘Thi’ tia puante hming hi an puang lo bawk a ni,” a ti.
“Hei hi tihsual palh a ni lo va, politics thil avanga inpaihna chiang tak a ni,” tiin a sawi bawk.
Gandhi-a chuan ‘vote ruk’ hi a awm a phal dawn lo tih hrilhin eptu tangrualte chuan Bihar inthlan hmain an bei zel dawn a, Supreme Court-a thubuai theh lutin poll panel-in SIR a kalpui chu nakuma Bengal, Tamil Nadu leh Assam-a inthlan turah tih ve tur hmahruai a nih theih thu a hrilh a ni.
Gandhi-a hi election commission leh rorel lai, BJP lakah nasa takin vote paihsak chungchangah hian a tawng chhuak a. Nikumah Karnataka leh Maharashtra-ah vote tam tak hetiang hian an tichingpen nia puhin Bihar-ah tih an tum leh niin a sawi.
EC chuan he puhna hi a pha a, Nilainia SIR kalpui duh lohna lantirnaa Delhi Police-in an hren, Gandhi-a chu a thil sawi finfiahna pe turin an ti let.
BJP pawhin Gandhi-a chet dan hi sawiselin ‘ram danpuiin a din body a sawi chhia’ niin an sawi tawh bawk.