Ganja lakna kawng inthlak

Engemaw lai atang khan Mizoramah ganja a hluar tha leh a, a mantute’n an man zat pawh mak tih tham a ni. Ganja hi tun hmaa Mizorama an laknaa mi kha an la tawh lo a, a kawng a inthlak tih chu a mantute sawi dan a ni.
Mizoram Excise & Narcotics (MEN) department hotute chuan ganja kawng a inthlak tawh tih an sawi a, tun hma chuan Manipur atanga lakluh a ni thin a, tunah chuan Tripura atanga lakluh a nih ber tawh thu leh, Myanmar atanga lakluh a nih bawk thu te an sawi.
“Tripura atang hian a rawn kal nasa a, tha deuhvin an compress a. West Tripura atang hian a rawn lut nasa,” MEN department hotu pakhat chuan a ti.
Myanmar atangin a rawn lut thin tih pawh an sawi a, Myanmar leh a thenawm ramte hi ruihhlo tamna a nih thu leh, Mizoram hi khawvel hmun danga an tawlhna kawng pakhat a nih thu te, ganja pawh hi khawchhak lam atangin Mizoramah a luh thin thu te an sawi.
Tun hnaiah Shillong atanga rawn lut an man fo tih pawh an sawi a, Shillong bawngsa rep kara rawn thawn an awm thin tih an sawi.
MEN department-in kuminah March thla thleng khan ganja hi kg 381.076 an man a, nikum kum tluana an man aiin hei hi a tam zawk. Chu mai a ni lo, January atanga March thla thlenga an man ang zat hi 2018 hnuah kum khat chhungin an la man ngai lo.
MEN department hian kuminah a hlawm lian thamin an man fo a, March thlaah pawh mi pakhat hnen atanga quintal 1.12 an man tum te a awm.