Gas book tih hre lo DAC dawng tan a thlen theih

Gas book tih hre lo DAC
dawng tan a thlen theih
Tunlai hian mi thenkhat, gas an book tih pawh hre lo hnenah Delivery Authentication Code (DAC) a thleng thin tih hriat a nih thu Food, Civil Supplies & Consumer Affairs department chuan sawiin, hetiang dawng chuan IOC hnenah emaw department-ah emaw thlen theih a ni.
FCS&CA department thuchhuak chuan, DAC hi gas dawn hunah chauh gas distributor-te hnena pek tur a ni a. DAC pek loha delivery report dawn pawh phal a ni lo tih sawiin, ‘Hei hi thil serious tak a ni a, an hriat lohin tuten emaw an hmingin gas an lo book tihna a ni. Hei hian a nghawng chu, kumkhat chhunga subsidy-a gas an lak theih zat a titlem dawn a. Hetiang thil tawk chuan IndianOil ONE application atangin complaint theih a ni a, FCS&CA department-ah pawh a thlen theih a ni,’ a ti.
LPG distributor-ten LPG filled cylinder an pek/sem dawnin Marketing Discipline Guidelines phut angin ‘gas bur tak awm buk dik tak chauh an phurchhuakin bukna dik thlap an keng anga, customer hmuh lai ngeiin a dik leh dik loh an buk leh tur a ni’ tih chu an zawm ngei tur a ni tih pawh a sawi a. Gas bur ruak rih zawng hi a burah a inziak a, domestic LPG lak dawn chuan a bur rih zawng inziak leh kg. 14.2 (e.g.14.2+15 = 29.2 kgs) belh tur a ni tih a sawi.
Liquefied Petroleum Gas (Regulation of Supply and Distribution) Order 2000 sawi angin a rih zawng tur dik tak aia gram 150 pel loa a zang emaw a rit zawk emaw a nih chuan ngaihhnathiam tur a ni tih a sawi bawk.