Gaza City luah tum Israel-in an beih chhunzawm zel

Gaza City luah tum Israel-in an beih chhunzawm zel
Israel-in Gaza City luah tuma hma a lak meknaa an sipaite chuan thlawhna atangin mihring chen tamna lai nasa takin an kap leh a, mi tam tak thiin mi sang tel baihvaiin an awm phah.
Ningania Israeli beihnaa thi zingah hian khawpui chhim lam Sabra venga naupang pali tela mi paruk thihna pawh a tel niin a bul hnaia al-Ahli Hospital chuan Al Jazeera a hrilh.
Khawchhak lam, Sheikh Radwan-a thil thleng pakhatah chuan khawlaiah ruang a let a, thi hnenghnuanga insaseng leh beihna avanga thil chhia leh kang hluah hluah hmuh tur a awm.
Gaza City beihna thite bakah hian Gaza Strip pumah vartian atanga thim thlengin Palestinian 40 vel an thi niin damdawi in chuan a sawi a, an zinga pariat chu puihna dawn tuma intlar mek zinga mi nia sawi a ni.
Hmarthlang lama Khan Younis-ah chuan Israeli drone-in a fuh avangin Palestinian panga an thi a, hmar lama Rafah-ah puihna semna hmun bulah Israeli sipaiten mi pathum vel an thah bawk niin Al Jazeera chuan a sawi.
Hmar lam thova Jabalia al-Balad-ah Israeli laipui kah avangin mi pali thiin mi dang 10-in hliam an tuar bawk niin emergency duty chuan an sawi a. Gaza lailia Netzarim axis-ah tanpuina nghak mi panga thiin an zinga pahnih chu naupang an ni tih Al-Awda Hospital chuan a sawi bawk.
Gaza City bikah hian Israeli sipaite chu daiah inkulhin Palestinian sang telin an beih huna an him theihna tur dapin an in leh an chhuahsan a, hetih lai hian mihring bitna, Sabra leh Tuffah chu ral atanga kah reng a ni bawk.
“Hun hrehawm rapthlak kan hmachhawn mek a, ina thih emaw, chhuahsana khawiah emaw va thih kan nghak tawp mai a ni. Indona hi a kal zel chuan kan dam chhuak ang em tih engmah a sawi theih loh,” tiin kum 67 mi, fa pasarih neih, Rabah Abu Elias chuan Reuters news agency hnenah a sawi.
“Chanchin tharah chuan inremna a awm mai thei tih kan lo hria a. Hetah erawh chuan thil puak ring tak tak leh thihna chauh kan hria a. Gaza City hi kan chhuahsan mai dawn nge tih chu thutlukna siam har tak a ni,” a ti.
Israeli sipaite hian a hmain Gaza City khawchhak lama Tuffah leh Shujayea vengah hetiang beihpui hi an thlak tawh a, tunah hian chhimchhak lama Zeitoun leh Sabra district-ah an kalpui leh mek a ni.
Gaza-a indona hi October 7, 2023-a Hamas-in Israel luhchilha mi 1,200 chuang an thah leh hren tura mi 251 an hruai hnua Israeli sipaiten phuba lak nana an beih zuina kal zel a ni a. Gaza-ah hian Palestinian 6,2000 chuang an thi tawh.
Tun hnaiah Israel hian an khawpui ber, Gaza City hi luaha Hamas chhut chimih vek tumin hma thar an la a ni.