Gaza inbeihnaah damdawi in him lo ti

Gaza-a damdawi in lian bera hnathawkte chuan damlo leh refugees-te chu dinhmun chhia leh derthawng takin an awm mek tiin an sawi a, a chhehvel kawthlerah inbeihna nasa tak a thleng mek reng bawk.
Gaza city-a Al-Shifa a surgeon chuan damdawi in chuan tui, eitur leh electricity te an nei tawh lo tiin a sawi a.
Israel chuan Hamas te nen damdawi in bul lawkah an inbeih thu sawiin mahse damdawi in chu an khawih tel lo tiin an sawi ve thung a. Chumai bakah nausente chu damdawi in him zawkah an sawnsak tur thu an sawi bawk.
Al-Shifa ah hian naupiang hlim 20 vel zette chu surgical theatre-ah dahin an awm a, doctor-te chuan neonatal intensive care unit chu electricity awm loh avanga a thatloh avangin nausen te chu thi mai thei dinhmunah an ding an ti.
Damdawi in chhungah dam lo zai zawh hlim te insaseng thei lo tam tak an awm a, ruang tam tak phum lohin a awm mek tia sawi a ni bawk a.
Al-Shifa damdawi inah hian himna zawngin mi sang chuang an lutkhawm bawk a, hei hi a chhehvela inbeihna a nasat vang a ni.
Israel Defense Forces (IDF) te chuan Hamas te chu damdawi in hnuaia leiverh atanga operation neiah an puh a, hei hi Hamas te chuan an hnawl ve thung.
Surgeon Marwan Abu Saada chuan Al-Shifa ah chuan second tinin silaimu ri leh bomb thlak ri a inrik chhawk a, a thangkhawk reng tiin a sawi a. Mithi tawhte ruang phum tumna pawh a chhehvela inbeihna thleng reng avangin kalpui theihin a awm lo, a ti bawk.
“Heng ruangte avanga natna inkaichhawn awm thei kan duh lo a ni,” tiin a sawi bawk a, generator hman theiha a awm loh avangin morgue refrigerator te chu hmantlakin an awm lo, a ti bawk a.
Doctor group Physician for Human Rights Israel te chuan electricity awm loh avangin nausen pahnihin nunna an chan phah tawh tiin an sawi a. Nausen 37 vel te chu dinhmun derthawngah an awm a ti bawk.
Israel thung chuan Al-Shifa chu an hual lo tia sawiin damdawi in chhak lamah chhuahna siamin an hawng reng tiin a sawi thung a.
Rear Admiral Daniel Hagari chuan Israel chuan paediatric department-a awm tute pawh damdawi in him zawk an pan theih nan an pui ang a ti bawk a. Damdawi In thuneitute nena inbiakna neiin Israel chuan puihna a pe dawn tiin a sawi bawk.
A hma pawhin Colonel Moshe Tetro chuan Al-Shifa bul hnai deuhah Hamas te nena inbeihna a thlen thu sawiin mahse damdawi in kan khawih lo a ti bawk a.
International charities te chuan damdawi ina damlote pawh Gaza-a inbeihna nasa tak avanga medical treatment an hmuh mumal theih loh avangin an dinhmun a derthawng hle a lo ti tawh bawk.
Doctors Without Borders (MSF) deputy medical coordinator chuan inkahhaina a awm lo a nih chuan heng damdawi ina damlote hi an thi vek ang a, thlanmual a ni hawt ang tiin a sawi.
Al-Quds hospital-ah pawh Palestinian Red Crescent Society (PRCS) te chuan an team te chu damlo 500 chuang te leh refugee 14,000 vel te nen danchahin an awm tiin an sawi bawk.
Hetih lai hian Gaza-a damdawi in tenau zawk Al-Rantisi erawh a tam ber ten chhuahsan tawh thungin damlo tlem leh staff thenkhatte chauh an awm thung.
Gaza Strip-ah hian mihring maktaduai 2.2 vel zet chengin mahse indona chhuah hnuah 1.5 million vel te chu chenna mumal nei lovin an awm mek tiin UN’s agency for Palestine refugees (UNRWA) te chuan an sawi.
Hamas-te hian 7 October khan Israel ram chhungah Israel mi 1,200 an tihlum a, a tam ber te chu civilian te niin mi 200 vel an hreng bawk a.
He mi chhang let hian Israel chuan chet la nghalin Gaza-ah nunna chan 11,000 chuang an awm phah tawh tiin Hamas-run health ministry chuan a sawi a, heng zinga 4,500 chu naupang an ni, a ti bawk.
Hetih lai hian French president Emmanuel Macron chuan Israel chuan Gaza-a hmeichhia leh nausen te a tihhlum chu a tihtawp a ngai tiin a sawi a. Macron chuan inkahhai rawtin US leh UK te pawhin an pawmpui a beisei thu a sawi bawk.
Hetih lai hian United Nations chuan Gaza City-a UN facility chuan beih a tawh avangin indona tlansantu Palestinians za tel awmkhawmna niin mi tam takin nunna an chan phah tiin a sawi.
“He hmun beihna avang hian thi leh hliam thahnem tak an awm a ni,” tiin United Nations Development Programme thuchhuah chuan a sawi a. “He buaina avanga civilian te tawrhna leh thihna leh hliam an tawrh hi pawm theih a ni lo va, tihtawp a ngai a ni,” a ti bawk.
Kawtthlerah ruang tam tak let rem rum bawkin inbeihna a nasat em avangin chung ruang te chu hlawm theih pawhin a awm lo mek tih a ni bawk a.
UN agency for supporting Palestinians (UNRWA) te chuan indona chhuah hnuah Gaza Strip-ah an hnathawk 100 chuangin nunna an chan phah tawh tiin a sawi bawk.