Germany in quarter-final an lut

Euro 2024 khelh mekah champion tura rinkai ber zinga mi Germany chuan inrinni zan khan si hnih faiin Denmark an hneh a, quarter-final an lut. Germany hi Spain hmachhawn thei dinhmunah an ding a. Quarter-final-ah Spain nen an inhmachhawn a nih ngat chuan final ai pawha hmuhnawm zawk ni hial thei tura ngaih a ni.
Inelna thlengtu Germany leh team hmuhnawm Denmark te hi BVB Stadion Dortmund-ah an inhmachhawn a, inkhel hmuhnawm leh nung tha tak an chhawpchhuak. Inkhel tan tirh phat atanga inkhel tawp rat thlengin ngam takin an innawr tawn a, football ngainatute tan inkhel hmuhnawm an langtir. Inkhel hmuhnawm tak daidantu chu penalty leh off-side a ni a, vanduai zawkah Denmark an tang.
Thehlei nungkhai an sawi ang vat vata inkhel rang, inkhel hmuhnawm takah hian Germany in goal an thun hmasa a, Jonathan Tah aia lut Borussia Dortmund defender Nico Schlotterbeck chuan an mualah ngei chiang zeta tauh goal in hmahruaina goal a thun. He goal hi VAR hmanga endik a nih hnuin hnawl a ni thung.
Ngam taka an innawr tawn hnuin Denmark in hun tha an nei a, Manchester United forward Rasmu Hojlund chuan goal thun theihna hun tha zet mai a nei. Hojlund hian pet chhe lem lo viau mah se Germany si nghak Manuel Nuer-a’n a ropuizia lantir nan a hman a, pui zetin a dansak. Hemi hnu hian Germany pawhin hun tha an nei zui ve leh nghal a, si nghak tawnhriat ngah Kasper Schmeichel ang paltlang thei bik lo.
Goal thun tuma an innawr tawn chhen hnuin Denmark in goal an thun hmasa ta nge nge. Box chhunga buai deuh nuaih nuaih kar atangin defender Joachim Andersen chuan chiang zetin a pet goal. VAR hmanga ennawn a nih hnuin Andersen goal hi hnawl a ni ve leh a, Germany an him. Hnufual zawk an nih thuak hnuin Germany an vannei chhunzawm a, penalty an hlawhchhuak. Andersen handball vanga penalty an hmuh chu Kai Havertz chuan ding lam sir kilah tha zetin a pet goal a, minute 53-naah hmahruaina goal a thun ta nge nge. An mualah goal thun hmasa zawk an nih vangin Germany an phur a, inrintawkna sang zawk nen an inlan zui ta chiah bawk.
An si phurh sut tuma tan an khawh nasat luatah Denmark an chesual a, goal an chhuah belh teuh hle. Euro 2024 khelh meka manager naupang ber Julian Nagelman-a’n Niclas Fullkrug aia a rin zawk Havertz chuan mawi zetin a khalh tlang a, goal thun theihna hun tha zet a nei. Arsenal atanga vul thar leh Havertz hian si nghak Kasper Schmeichel chiah hmachhawn tawh mah se goal chhungah a pet lut thei lova, uiawm takin a hun tha a hlah.
Havertz-a’n a hun tha neih a hlah hnu hian Germany in an hun tha an hmu leh thuai. Fuh taka ball an inpek kual hnuin ball an vawrh lut thut. Defender Andersen umphak rual lova tlanchak Jamal Musiala chuan si nghak chetha tak Kasper Schmeichel dan rual lohin goal kilah a pet lut a, minute 68-naah an goal hnihna thunin, an hmahruaina a tizau.
Team lian leh tha rual zawk Germany lakah si hnih an phurh hnuin Denmark tan tih theih a tam tawh lova, awmze nei leh hlauhawm takin mualneitu an nawr tlang hleithei meuh tawh lo. Kum 2007 hnu lama hneh theih tak loh Germany lakah an tlawm leh ta nge nge a, Euro 2024 atangin an puanthuah an tel zui ta a ni.
Champion tura rinkai Germany hian quarter-final ah Spain leh Georgia te inkhela chak zawk zawk an hmachhawn zui leh ang. Inelna thlengtu an nih vangin Germany hian champion teihna hun tha tak an nei a ngaih a ni.