Germany-in Russia-a a ambassador ko haw

Germany chuan Chancellor Olaf Scholz party te chu Berlin in state-sponsored Russian cyberattack an tawk a tih avangin Russia a a ambassador chu a kohaw.
German sorkarin chhuichianna a kalpui hnuah Scholz a Social Democratic Party te chu APT28 group te chuan an bei tiin Foreign Minister Annalena Baerbock chuan kar kalta khan a lo sawi tawh a.
Heng group-te hi Russia military intelligence te thuhnuaia awm niin chu vang chuan ‘Russia-in Germany chu cyber hmangin a bei’ tihna a ni tiin Baerbock chuan a sawi a. Russia erawhin puhna chu ‘finfiahna awm lo leh behchhan awm lo’ tiin a sawi ve thung.
Kan envoy Alexander Graf Lambsdorff chu kan ko haw a, Berlin ah karkhat a cham hnuah Moscow-ah a let leh chauh ang tiin ministry thupuangtu chuan a sawi bawk.
German chuan cyberattack chu a ngai thutak hle a, kan liberal democracy beihna angah kan ngai a ni, tiin Baerbock chuan a sawi bawk.
APT28 te hi Fancy Bear tia hriat lar an ni bawk a, ram hrang hrangah cyberattack kalpui thin an ni.
SPD party an hack hi nikum khan mipui hriata puanchhuah chauh a ni a. Hackers te chuan Microsoft Outlook a thil fel lote chu remchangah lain an hack theih phah tia sawi a ni.
Berlin chuan kar kalta khan Russian ambassador chu he thil chungchangah hian thuzawhfiah atan a lo ko tawh bawk.
Czech Republic pawhin kar kalta khan APT28 te chuan an state institution thenkhat te an bei tiin a sawi bawk.
European Union member ten beih an tawk tiin EU chuan Moscow chu cyberspace a chet dan tha lo tak chuan nghawng a nei ang tiin a vau let tawh bawk a ni.