GIG-in kum 7 tlin lawm nan Rs 5,00,000 charity-ah pe

Mizorama Maruti Suzuki dealership GIG Motors chuan Zirtawpni kalta an kum sarih tlin champha chu Edenthar-a Arena showroom-ah lawmin, hemi pual hian luanchhuahna neiin Zo Inspiration-ah Rs 3,00,000 leh Thutak Nunpuitu Team (TNT)-ah Rs 2,00,000 an hlan.
GIG Arena showroom hi August ni 23, 2017 khan an hawng a, a tirah thawktu mi 50 velin bul an tan a, tunah chuan thawktu mi 308 an tling tawh. GIG hian huang zauh zelin, 2018-ah Maruti Suzuki hnuaiah tho Commercial vehicle showroom, Chaltlangah an awng a, April 2019-ah Nexa showroom, |huampuiah hawng lehin, October 2021-a Lungleiah Arena outlet leh service centre an hawng leh tawh.
GIG hian kum sarih chhungin Maruti Suzuki lirthei chi hrang hrang 15,000 chuang an hralh chhuak hman a, chung zinga 10,224 chu Arena atanga hralh chhuah niin, Nexa atangin 4,750 leh Commercial 810 an hralh chhuak hman.
GIG CEO John Lalpeka chuan an sumdawnna harsatna chi hrang hrang an tawh thin thu sawiin, vawiin an thlen theihna chu Pathian vang chauh a nih thu a sawi a. A sumdawnnaah miten a theih loh ang an tih te titheitu nih chu thil nuam ve tak a nih thu a sawi a, rim taka thawh chuan theih loha miin an ngaih hi a tih theih thin niin a sawi bawk.