Global Citizen Fest 2023 co-headliner Jung Kook

BTS member Jung Kook tan kumin hi kum tha zet mai a ni a, solo artist anga a vawi khat nan Billboard Hot 100-ah Latto nena an hla ‘Seven’ a No.1 pui tawh a, tunah chuan 2023 Global Citizen Festival lineup-ah telin, co-headliner a ni dawn tih an puang ta. Jung Kook hi he US featival lianah hian a vawi khat inlanna tur a ni.
Jung Kook chuan thuchhuah siamin, “Kumin Global Citizen Festival headliner anga ka zawm ve tur hi ka phur hle a ni. He festival hian chhan leh tum tha tak a nei a, ka inlan ve tur hi ka lawm a. Great Lawn, Central Park-a mipui tam tak hmaa inlan hun ka nghalhlel tawh khawp mai,” a ti.
Global Citizen Festival hi New York City-a Central Park-ah September ni 23-a neih tur a ni a, festival hi a thlawna chhim theih a ni nain, ticket a awm a, ticket nei tur chuan Global Citizen app emaw an pawl website emaw kaltlanga retheihna um bo tura eng emaw tih a ngai ve thung. Global Citizen chuan UN General Assembly, New York-a neih tura khawvel ram hrang hrang hruaitu pungkhawm te chu khawvel sik leh sa buai ta lutuk te ngaipawimawh a, hmeichhia te dinhmun chawikan kawng hma la chak lehzual tur leh khawvel hmun hrang hranga chaw kawpuar a ei tur nei lo te hre reng turin an ngen nghal bawk a ni.
2023 Global Citizen Festival headline turin Jung Kook hian Red Hot Chili Peppers, Lauryn Hill leh Anitta te a zawm ve dawn a, anni bakah hian Conan Gray, D-Nice, Megan Thee Stallion, Sofia Carson leh Stray Kids te pawh an perform dawn a ni. Global Citizen Featival hi khawvel hmun hrang hrang atanga en theih turin livestream a ni ang.