Golden Ring buatsaih a ni dawn
Kumin August thla hian Mizoram Boxing Association (MIZBA) leh Thlik Thlok Entertainment & Charity Network tangdun buatsaih Golden Ring buatsaih a ni dawn a, a ni (day) tur tak erawh national competition awm thei leh boxer-te dinhmun thlir chungin ruat fel tur a la ni.
Mizorama amateur boxing chawi vul a, national leh regional boxing competition-ahte Mizoramin medal tam zawk kan lak theih a, Olympic leh international competition hrang hranga Mizoram kan tel theihna tur leh boxing hmanga thalaite’n hna an hmuh tam zawk theihna’n competition tam zawk a awma kan boxer thate an fit theihna’n hma lak a ngai a, he mi atan hian MIZBA leh Thlik Thlok chu an thawkdun ta a ni.
He thawhdunna atang hian MIZBA buatsaih competition-ah prize money siam a ni dawn a, chu mai bakah thla tin prize money tha tham Golden Ring a awm dawn bawk a ni.
Tunah hian Golden Ring 2 leh 3-a inhnek tur ruahman chhoh mek a ni bawk a, boxer-te tana hamthatna tam zawk a awm theihna’n chak taka ke pen zel a ni.
August thlaa Golden Ring 1-a inhnek tur ruahman fel tawh niin, he’ngte hi an ni:-
Bantamweight (50-55)
Lalhruaitluanga
vs Moses Lalruatfela
Lalhruaitluanga: Ani hi Hnahthial Model Veng boxer niin, rawlthar kum 19 mi (height – 171 cm, reach – 175 cm, weight – 55 kg) niin, national level-ah Mizoram tana vawi ruk a fehchhuah tawhah bronze medal pakhat hawn tawhin, state level-ah gold medal pariat, silver pakhat leh bronze medal pakhat bawk a hnekchhuak tawh.
Moses Lalruatfela: Lunglei Vengpui rawlthar kum 19 mi (height – 169 cm, reach – 173 cm, weight – 55 kg) hian national level-ah vawi li chhuak tawhin bronze pahnih Mizoram tan a hawn tawh a; state level-ah gold pahnih leh silver
pakhat a awrh ve tawh.
Welterweight (60-65)
Vanlalchhuanawma
vs PC Remruatdika
Vanlalchhuanawma: ITI Veng, Aizawl
rawlthar kum 19 mi (height – 172 cm, reach – 174.7 cm, weight – 64.5 kg) hian national level-ah tournament vawi li khel tawhin, state level-ah gold medal pasarih leh silver pahnih a dawng tawh.
PC Remruatdika: Ramthar Veng, Lunglei tlangval kum 21-a upa (height – 168 cm, reach – 173 cm, weight – 64.8 kg) pawh hian vawi li bawk national huap inelna hmachhawn tawhin, state chhung bik inelnaah gold 13, silver pariat leh bronze medal pasarih a hui tling ve tawh a ni.
Light Middleweight (65-70)
Malsawmkima vs Franky H. Vanlalruatpuia
Malsawmkima: Muthi boxer kum 22 mi (height – 178 cm, reach – 180 cm, weight – 67.5 kg) hian national level-ah tum li ngawt Mizoram ai a awh tawh a; state level bikah gold medal panga a sualchhuak tawh.
Franky H. Vanlalruatpuia: Lunglei Salem Veng fighter kum 22-a upa (height – 177.8 cm, reach – 174 cm, weight – 70 kg) hian national level-a tournament vawi nga a khelh tawh atangin silver medal pakhat leh bronze pahnih hnekchhuak tawhin, state chhung inelna atang phei chuan gold medal 15 tehreng a awrh tling tawh.
Heavyweight (80-85)
Franky Malsawmdawngzela
vs Nicholas Vanlalhumhima
Franky Malsawmdawngzela: Cherhlun rawlthar kum 17-a upa (height – 172.72 cm, reach – 173 cm, weight – 81 kg) hian state level-ah gold pahnih leh bronze pakhat a hnek chhuak ve tawh.
Nicholas Vanlalhumhima: Kum 24-a upa, Aizawl Edenthar boxer (height – 172 cm, reach – 182 cm, weight – 85 kg) hian state chhung tournament atangin gold medal pahnih a sual chhuak ve tawh.