Green-Ag Project-a hmalakna thlir

Mamit district-a Green-Ag Project kalpui dan thlirletin Ningani khan Techincal Support Group chu an chairman, bawrhsap Jacob Lalawmpuia hoin an thukhawm a. Agriculture leh line department dang atanga mithiamte an tel.
Kumin atana Green-Ag Project-in Mamit district-a hmachhawp a neih langsar zual chu – aieng leh vaimin chingte tan turmeric processing unit din, feed mill thawmthat, water harvesting structure siam, sangha dil siam, tualchhung sangha tihpun leh, Mamit district-a project khawtina school naupangte Eco-Club kaltlanga environmental awareness pek, environment kaihhnawih ni pawimawh bikah painting leh drawing intihsiak huaihawt, soil testing kit hmanga lei tha leh thalo tehpui te a ni.
Green-Ag Project hian Lunglei leh Mamita hectare 8972.1 vela zauah leh khaw 38-ah hma a la a. Mamit district bikah hian W. Phaileng RD Block hnuaia khaw 20, Zawlnuam RD Block hnuaia khaw 2, Reiek RD Block hnuaiah khaw 2, a vaiin khaw 25-a kalpui a ni.
Thutkhawmah hian project Annual Work Plan & Budget (2024- 2025) atan cheng vaibelchhe 9.8 leh Mamit district bik tana duan Green Landscape Management Plan (GLMP) chu pawm a ni nghal.