Group B-ah France an sang fal
Ninga zana Euro 2024 khel tur zawnnaah Group B hmahruaitu France chuan an mikhual Republic of Ireland chu si hnih faiin an hneh a, ham an hruai fal zui zel. Group B-a inkhel dangah team lian Netherlands pawhin hnehna an chang ve bawk a, pahnihnaah an inhlangkai.
France hian Parc des Princes-ah an group-ah palinaa awm mek Republic of Ireland an mikhual a, harsatna lian tawk lovin hnehna an chang. France tan hian minute 19-naah Real Madrid midfielder Aurelien Tchouameni chuan pui takin hmahruaina goal a thun. Hma takah goal thun bawk mah se chawlhlawk hmain goal dang an thun belh thei lova, si khat faia hmahruai chungin chawlhlawk an hmang.
Chawlhlawk hnu lamah France an khel tha chhunzawm a, goal an thun leh thuai. Minute 48-na lekah Marcus Thuram chuan an goal hnihna a thun. Heng goal hnih hmang hian an mualah hnehna an chang a, point thum an hmu. Francce hian khelh nga atangin point 15 an hmu a, an mahni hnaih bertu Netherlands aiin point kua zetin an sang fal mek a. Netherlands ai hian vawi hnihin an khel tam zawk mek thung.
UEFA Nations League semi-final an khelh vanga Euro 2024 khel tur zawnnaah group B-a khel tlem Netherlands hian Philips Stadion-ah an chunga awm Greece an mikhual a, si thum faia hnehna changin, point thum hlu tak an hmu.
Netherlands hian an mikhual Greece lakah an khel tha viau a, chawlhlawk hmain goal thum an thun hman. Minute 17-na lekah Marten de Roon chuan hmahruaina goal a thun a. Minute 31-naah Cody Gakpo-a’n an goal hnihna a thun bakah minute 39-naah Wout Weghorst chuan an goal thumna a thun zui leh cheu a. Si thum faia hmahruai chungin chawlhlawk an hmang. Dutch hian chawlhlawk hnu lamah pawh an khel tha chhunzawm viau naa goal dang an thun belh thei lo thung. Goal thun belh thei lo mah se, an mualah awlsam takin point thum an hmu tho thung a ni.
Netherlands hian khelh thum atangin point 6 an hmu a, pahnihnaah an inhlangkai. An mualah an hneh tak Greece khan khelh li atangin point 6 an hmu ve bawk a, pathumnaah an tlahniam. Group B-ah hian Republic of Ireland chu point thum hmuin palina an ni mek a. Khelh li atanga point la hmu lo Gibraltar chuan table mawngphah an luah zui zel thung