GST-a thubuai chinfel ran dan rel

Sawrkar laipuia Revenue secretary, GST Council-a secretary ni bawk Sanjay Malhotra hoin Goods and Services Tax (GST) chungchanga thubuai awmte dan hnuaia mumal leh chak zawka bawhzui a nih theih nana pawimawh, GST Tribunal chungchang sawihoin Nilaini khan inbiak hmuh theihna hmangin thutkhawm a ni.
State leh UT 27 atangin chief secretary leh Taxation secretary-te an tel a; Mizoram atangin Taxation secretary Dr H Lianzela hoin commissioner of state tax R. Zosiamliana leh Taxation hotuten an chhim.
GST dan hnuaiah hian state leh UT zawng zawng tan GST State Bench neih tura tih a nih angin, tunah hian sawrkar laipui kaihhruaina hnuaiah chak taka hma lak a ni a. State Bench nei tur hian Mizoram sawrkar pawhin thui tak hma a la tawh.
He bench hi GST dan hnuaia thubuai hlabuai chinfelna atana ruahman ni a. Mizorama sumdawngten thubuai hlabuai an neih pawha Guwahati-a kal kher ngai loin, Mizorama chinfel a nih theihnan Taxation department leh Mizoram sawrkar chuan Mizoram bench neih tumin hma a la a, hlawhtling ngei tura ngaih a ni.