Haiti PM Ariel Henry-a’n ban remti ta

Haiti Prime Minister Ariel Henry chuan bang tura nasa taka nawrna a tawh reng hnuah prime minister atanga ban a remti ta.
Thawhtanni khan Jamaica-ah regional leader meeting neih niin chutah chuan Haiti politics sawihona neih a ni a. Henry hi tunah Puerto Rico-ah tangkhang mekin armed gang te chuan Haiti-a luh an remti lo a ni.
Video kaltlanga thuchah a sawiah Henry chuan a ban thu puangin Haitians te chu buaina a awm loh nana hma la turin a ngen a.
“Ka sorkar chu council din a nih veleh kan bang nghal dawn a ni,” tiin Henry chuan a sawi a.
“Haiti mipuite hnenah lawmthu ka sawi duh a. Haitians tin te remna leh muanna leh ngelnghehna a awm theih nan buaina awm lo tura hma la turin ka ngen a ni,” tiin a sawi.
Henry hi July 2021 a President Jovonel Moise thah a nih hnuah prime minister lailawk ni tura dah a ni a, mahse, inthlan buatsaih tura hmalakna te sawn zelin security tha a awm hmasak a ngai a ti a ni.
Haitians tam tak te chuan elected president nei lova an awm rei lutuk chu duh lovin Henry chu an sawisel nasa hle a.
Tun hnai lawkah armed gang te chuan Haitian capital Port-au-Prince kawtthler te luhchhuaha thununin prime minister chu bang turin an nawr zui bawk a. Port-au-Prince leh a chhehvel region ah te chuan state of emergency puan niin curfew pawh pawhseiin a awm zui zel a ni.
Henry chu Kenya-ah kalin an ram chhunga gang tam lutuk te hmehmih an nih theih nan international security force ngen a ni a, ram pawna a awm laiin armed gang te chuan chet la in police station te luhchhuahin Haiti lung in lian ber ber pahniha lung in tang te chu an lo chhuah zalen vek a ni.
Henry chuan an ram pan haw nghalin mahse Haiti international airport ah a tum remtih a ni lo va, thenawm ramah a tum ta ringawt mai a ni. Bang tura nawr zui niin a ban hma chuan Haiti a let leh armed gang te chuan an phal dawn loh thu an sawi zui a ni.
Caribbean ram intelkhawm Caricorn group of Carribean nations te chuan Henry chu Haiti a remna leh muanna awm theih nana harsatna thlentu zawk tiin bang turin an nawr zui ta a, inthlan that a awm hma chuan council dina chung mi te chuan Haiti chu enkawl rih se an ti bawk.
White House chuan Henry chu Haiti let leh phawt se chutah sorkar inthlak thleng tha taka kalpui ni se an ti zet a, mahse Haiti ram chhunga inbeihna nasa tak thleng avangin a rilru a thlak leh ta a ni. US state department emaw thenawm ram te thlawpna a hmuh loh chuan Henry chuan ban mai loh chu tih theih a nei lo a ni.
Henry chuan Haiti leh let a duh thu sawiin mahse security a that phawt hma chuan a let leh theih loh thu a sawi zui bawk a. US official te chuan kar kalta Zirtawpni-ah tawh khan Henry chuan prime minister atanga ban a remti tawh tiin a sawi.
US Secretary of State Antony Blinken chuan Hati ah UN thlawp Kenyan security force 1,000 te thlawp nan $100 million a pek tur thu a sawi a. Tihian US chuan Haiti a remna leh muanna awm theih nan US chuan $300 million a thehchhuah dawn ta a, humanitarian aid atan $ 33 million a pe dawn bawk.
Kingston a meeting an neih zawh hnuah Caricom group chairman leh Guyana President Irfaan Ali chuan, “Transitional presidential council dina interim prime minister ruat a nih theih nan Henry chu a ban phawt a ngai a ni” tiin a sawi.
President Ali chuan transitional presidential council ah chuan observer pahnih leh voting member pasarih an awm ang a, chungah chaun coalition aiawh te, private sector leh civil society aiawh te bakah religious leader pakhat a awm bawk ang a ti.
Council chuan a rang thei ang berin interim prime minister a ruat ang a, mahse Haiti inthlan awm tura chuh tum te chu an inhnamhnawih a rem dawn lo tiin a sawi a. Interim council chuan kum 2016 hnua Haiti a inthlan hmasak ber awm tur a buatsaih dawn a, inthlan hma chuan thuneihna an chelh rih ang.