Haryana-a ni 15 chhunga mi 12 thihnain ngaihven hlawh
Haryana-a ni 15 chhunga mi 12 thihnain ngaihven hlawh
Haryana-a Palwal district, Chayansa khuaah ni 15 lek chhungin naupang panga tela mi 12 an thih avangin health department chuan an ngaihven hle a, tui thianghlim lo in leh hri leng a awm em tih chik takin an ngaihven.
Thuneitute chuan January thla tawp leh February laihawl thleng khan thin tha lo kaihhnawiha thihna a awm tih an sawi a. An chhui tawh chinah hepatitis leh tui thianghlim lo a ni thei tih an tar lang.
January 31 khan mitliam kaihhnawiha thihna thleng hmasa ber chu chhungkaw 865-a mi 5,700 chenna, Chayansa khuaah hian a thleng a. Rapid response team pawh tirh an ni a. Medical camp, in tin luta survey leh khaw mite endik pawh tih a ni.
Thi zinga pasarih hi January 27 leh February 11 inkara mi an ni a. Pali chu acute hepatitis emaw, thi tha lo emaw vanga thi an ni a. Thite hi kum kua leh 65 inkar an ni a. Thi dangte hi en chian mek an ni a. Damlo tam zawk hian an thin, an pum an sawisel a, an luak a, an mit a liam bawk.
Thla hmasa khan Madhya Pradesh-a Indore-a tui thianghlim lo in avangin mi 16 an lo thi tawh bawk a, hei vang hian tuna mi hian ngaihven a hlawh phah.
Palwal Chief Medical Officer Satinder Vashisth-i chuan mi endik hna thawh reng a ni tih a sawi a. “Thite nena inhnimhnai zualte telin mi 1,500 vel endik an ni tawh a. Inentir 800 vel kawm chian an ni tawh a, an thisen laksakin Hepatitis A, B, C leh E an vei em tih en a ni,” a ti.
Thisen an en 210 zinga pahnih chuan Hepatitis B an vei a, pakuain Hepatitis C an vei a. An vaiin Hepatitis A leh E lakah erawh an him a. Scrub typhus an vei em tih result nghak mek a ni a, damdawi ina damlo pathum awmte dinhmun a tha rih bawk tih a sawi.
Chhungkaw 107 tui tlan an endiknaah 23 chu a him lo va, bacteria awm leh chlorine tha tawk lo a ni a. Tank an endiknaah coliform bacteria an hmu bawk.
Chayansa-a chengte hian sorkarin tui a sem, tuichhunchhuah leh tanker-ten an pek an ring deuh ber a. Reverse Osmosis-treated water chu an thenawm hnai atangin an la bawk a. Tuichhunchhuahte hi an tihfai ngun tawk loh avang leh a tihthianghlimna hmanga tihthianghlim that loh avangin tuia insiam chi natna darh theihna awlsam tak a ni.
Thuneitute chuan leptospirosis test chu a negative a, ran vulh atanga inkai natna a nih a rinawm loh bawk a. Invenna atan tui tihthianghlimna turin halogen mum 15,000 sem a ni a, a tula biakpawh theihna tur siam a ni bawk.