Haryana CM thar Nayab Singh Sani

Haryana politics chu inthlak danglam thutin Chief Minister Manohar Lal Khattar leh a cabinet te chu Thawhlehni zing khan an bang thut a, hei hi Lok Sabha inthlan awm mai tura rorel lai Bharatiya Janata Party-Jannayak Janta Party alliance ah seat-sharing ah ngaihdan inmil lo a awm vang a ni.
Khattar hi bang mah se, BJP te chuan sorkar thar siam leh nghal mai thungin Nayab Singh Saini chu Chief Minister thar atana lakluh a ni. BJP te chuan Assembly member 90 awmnaah MLA 41 a nei mek a, JJP MLA panga ten an thlawp tia sawi a ni bawk a.
Heng JJP MLA panga te hian BJP an zawm ang a, sorkar thar siam a ni ang a, mahse minister ah dah an ni lo vang tia sawi niin chu mai bakah independent MLA pasarih ten an thlawp dawn tho tia sawi a ni bawk.
“Kan thlawp dawn thu kan sawi chiang tawh a. Lok Sabha inthlan lo awm tur atan strategy kan sawiho tawh bawk a. BJP-JJP alliance chu a keh chhe tawh a ni,” tiin Nayan Rawat, independent MLA chuan a sawi.
BJP legislative party meeting chuan Saini chu chief minister atan an thlang a. He inhmuhkhawmnaah hian Union junior Agriculture Minister Arjun Munda leh National general Secretary Tarun Chugh te pawh an tel a ni. Hetianga Haryana a BJP sorkar siksawi a nihna chhan hi Lok Sabha inthlan hmachhawn mai tur leh kumina Assembly inthlan hmachhawn tur hisapa ruahman nia sawi a ni.
BJP-JPP sorkar tlukna chhan bera sawi chu Lok Sabha seat-sharing ah ngaihdan inang lo an neih vang a ni a. JPP hotu Deputy Chief Minister hlui Dushyant Chautala chuan Haryana a Lok Sabha seat 10 awmah pahnih a hauh a, BJP te chuan pakhat chauh an pek pha vang a ni.
Kum 2019 Lok Sabha inthlanah khan BJP te chuan seat awm zawng zawng 10 an hui vek a ni.