Hasina-i paih thlak ni Student-People’s Uprising Day-ah puang
Hasina-i paih thlak ni Student-People’s Uprising Day-ah puang
Bangladesh-a Sheikh Hasina-i sorkar paih thlak ni, August 5 chu an rama sorkar lailawk ding mek chuan Student-People’s Uprising Day tia hming vuahin he ni hi ram pum chawlh turin a puang.
Prime minister hlui ni ta, Hasina-i hi mipuiin tharum nen nasa takin an nawr a, a himna pawh a derthawn avangin nikum August 5 khan paih thlak a ni a. Amah pawh darkar khat chhung velin a tlanchhe zui a, mipuiin a awmna, Gana Bhavan an luhchilh zui bawk.
Sorkar lailawk ding mek chuan committee dinin hei hi July charter thu puan chhuah duang tur an ni a, he charter hi sorkarin Student-People’s Uprising hrilh fiahna atana a hman tur a ni.
August 5 chu chawlh atana hman tur a nih thu Cultural Affairs Adviser Mostofa Sarwar Farooki-a’n Dhaka-a Foreign Service Academy-a thuthar lakhawmtute a kawmnaah Ningani khan a puang.
Sorkar chuan nikuma Hasina-i paih thlak a nih theih nana in irh chhuahna puala hun hman dan tur pawh duangin July 14 atanga August 5 thleng an hmang ang.
Hasina-i kaihhruai, Bangladesh Awami League party chuan lungawi lohna lantir kha Islam sakhaw la bing pawlten an thlawp a nih thu leh prime minister thah tumna a nih thu an sawi.
Hasina-i sorkar a tluk hnuah an rama hnam leh sakhaw zuitu tlem zawk, a bikin Hindu-te chuan Bangladesh-ah hian beih an tawk nasa hle a. Awami League chuan Muhammad Yunus-a kaihhruai sorkar lailawk ding mek chuan pawikhawihna lian tak taka inhnamhnawih mi firfiakte lung in atanga chhuahah an puh.
Kum tir lamah khan Bangladesh Election Commission chuan Hasina-i kaihhruai party hi an inziak luh khapin inthlan lo awm leh tur pawh an chuh a khapsak a, hei hian inthlan chu zalen leh dik tak a ni dawn lo nia sawi hnawlna a awm phah nasa hle a. Awami League hi Bangladesh-a anti-terror law hmanga khap a ni.
Bangladesh-a inthlan hi nakuma Ramadan hmaa neih a nih rin a ni a. Inthlan hun tur vel hi Yunus-a’n tun hnaia London-a a kal tuma Bangladesh Nationalist Party (BNP) Acting Chairman Tarique Rahman-a a hmuh atangin rin a ni.