Health leh Edn: Private vrs Gov’t

Health minister chuan, damloten sawrkar damdawi in aia private hospital pan an chak chhan chu nursing care a ni thin, tiin, hei hi a pawiin a veiawm em em a; sawrkar damdawi inah hian kan kalpui ve thei a ni, a ti. He thu hi kar kalta Inrinnia Mamit district hospital leh home hrang hrang a tlawhnaah a sawi.
Education-ah pawh hian, nu leh paten an fate zirna atan, senso tam zawk daih mah se, private school an pan hram hram thin a, hei hi a chhan chu, private school ten sawrkar school aia exam result an neih that zawk thin vang a ni.
Health department leh Education department hnuaia thawkte hian chhuanlam inang an neih pakhat chu, ‘thawktu indaih lo’ tih hi a ni thin. Thawktu indaih tak hi eng department-ah mah hian an awm tak tak lo.
Damdawi ina pawimawh ber pakhat chu Nursing Care hi a ni. Doctor-ten damlo an en emaw an zai emaw hnua damlote enkawl zui dan tur instruction (damdawi ei dan tur, injection dan tur etc.) tha tak leh fimkhur taka hlenchhuah chu nurse-te duty pawimawh ber a ni a. Chu bakah, damlote biaksawmna tawngkam mawi leh hawihhawm hman thlengin Nursing care hian a huam a. Doctor-te leh Nurse-te tawngkam hman dan hian damlote damna leh nat belhna a thlen thei ti hiala sawi a ni. Hengte hi chu doctor-te leh nurse-te hian an training laia an hriat tam pawl a ni hial ang.
Chu Nursing Care chu civil hospital-ah aiin private hospital-ah ‘a tha zawk’ thin a nih chuan, eng vanga sawrkar hospital-a ‘nursing care’ chu tha lo zawk hlauh nge a nih tak? tih hi zawhna pawimawh tak a ni. Nurse theuh theuh, zir chhuahna inang theuh theuh, an thawhna a dan tak avanga nursing care a danglam a nih chuan, hospital adminstration or management a inthat hleih tihna a ni mai ang em?
Chutiang bawkin, education-ah pawh, trained teacher, hlawh pawh tam zawk, facility leh infrastructure pawh tha zawk hnuaia thawk zirtirtute thawhna sawrkar sikul aiin, trained teacher ni ve lem lo, hlawh lah chu sawrkar sikula zirtirtute hlawh hmun lia thena hmun khat vel lek hlawh, facility leh infrastructure pawh changtlung lo zawkte ‘zirtirna’ a tha zawk a nih chuan, hetah pawh hian administration or management a inthat hleih tihna a ni mai em? tih bawk hi zawhna awm thei a ni.
Thawktute an pawimawh rualin inenkawlna (adminstration/management) hi a pawimawh tel a ni.