Health minister hovin hriselna lama hmalak dan tur sawiho

Nimin khan Health & Family Welfare Minister Lalrinpuii hovin State Level Governing Body Meeting on Climate Change and Human Health(SLGBCCHH) an thukhawm a, sik leh sa inthlakin mihring hriselna a nghawng dan leh chumi laka lo inven dan tur leh a tih nep dan tur te sawiho a ni.
Health minister chuan, sik leh sa nasa taka inthlak avanga kan tawrhna hrang hrangte hi department pakhat chauhvin a hmachhawn theih chi a ni lova, department hrang hrang tanho ngaihna thil a ni, a ti. Department tin ten inlungrualna leh thawhhona tha kan neih a ngai a, thawhhona tha kan neih a tulzia hi department tinah sawi uar a pawimawh a ni, a ti.
Dr. Vanlalrengpuia, State Nodal Officer, NHM chuan power point presentation hmangin, Climate Change-in mihring hriselna a nghawng dan leh natna hrang hrang a thlen dan te, chumi laka lo inven dan tur leh a nghawng tih ziaawm tura hmalak dan tur National Programme on Climate Change and Human Health (NPCCHH) in a buatsaih chu a entir bawk.
Sangchin Chinzah, IAS, Secretary, H&FW chuan, kum 2015 khan Prime Minister kaihhruaina hnuaia ‘Mission on Health’ hmalakna hnuaiah National Expert group ten NAPCCHH hi an duang a. NAPCCHH hi Ministry of Health and Family Welfare hnuaia kalpui niin, a programme NPCCHH hi kum 2019 khan tlangzarh a ni a. A thil tum chu sik leh sa inthlakin mihring hriselna nasa taka a nghawng tur ven leh tihnep a ni, a ti.