Hei le! India parliament in hniha sports bill thar an pass hun a hnai ta!

Hei le! India parliament in hniha
sports bill thar an pass hun a hnai ta!
National Sports Governance Bill an tih chu law ni turin India parliament in pahnih Lok Sabha leh Rajya Sabha-ah ngaihtuah a ni dawn a, an pass hunah chuan India ramah sports dan thar kan hmang dawn a, chu mi chungchang chu theih ang angin thlirho teh ang.
He thu hi tunkar Nilaini khan Indian Olympic Association (IOA) president PT Usha chuan sawichhuakin, Indian sports tana chhinchhiahtlak ni reng tawh tur leh India-in 2036 Olympics thlen a dil mekna kawnga puitu pawimawh a nih tur thu a sawi.
He bill hian mumal zawkin India sports administration a kaltir dawn a; National Sports Federations (NSFs) leh IOA kalphung leh inawpna pawh tha zawkin a dinthar tura beisei niin, chumi tinzawna duan a ni.
Sports dan thar kan hman hunah chuan India hian sports administration atana dan felfai tak nei leh kalpui ram USA, UK, China leh Japan tihte hnung a zui ve tawh dawn a ni.
National federation hrang hrang hruaitute’n he bill chungchang hi sawiin, IOA president Usha chuan India-in 2036 Olympics thlen a tumna kawngah he bill hian tangkaina lian tak a neih tur thu sawi chungin, “India-in beisei lianpui a neih lai tak maia rorelna inpui bera sports dan thar tur ngaihtuah a ni tur hi a fuh em em a ni,” a ti.
All India Tennis Association (AITA) interim secretary Sunder Iyer pawhin dan thar chu a tha hliah hliah dawn nia sawiin, mi zawng zawngin dan leh hrai (rules and regulations) inang kan zawm tawh tur hi a tlukpui awm lo khawpa tha niin, tunhma anga a mi ang zela dan hrang kan hmang nuai nuai ang kha a bo tawh dawn a,” tiin bill putluh tur a fak.
Iyer hian an bill duanchhuaha fuh lo lai awm thei a tarlang tel nghal a, national federation-a Executive Committee seat an bithliah dan chu chep deuh dawna a hriat thu sawiin, “India hi ram lian tak a ni a, EC atana member 15 chin chiah bithliah ngawt mai hi a tawt hle dawn a; a lo berah pawh seat 4-5 chu sport behchhana mi chungchuang bik (sportspersons of extraordinary merit) leh athletes commission member-te’n an luah a lo ngai ang a; chuti a nih chuan state 36-te chuan member 10-11 chauh kan chang dawn a, hmun inchuh boruak ngawt pawh hi a sosang viau thei a, EC huang hi zauh ngei chu a ni,” tiin an pawl thlir dan a sawi.
Parliament-a an bill pass tura hmun pawimawh luahtu dang leh chu National Sports Tribunal din a ni tur hi a ni.
He tribunal hi player thlan chungchang atanga federation leh athlete-te nghawng vek inthlanna chungchanga thu inchuh leh felhlel ngaihtuahtu tur thuneihna sang tak nei, court pangngai, civil court kan tih ang chiaha thuneihna nei tur a ni dawn a; tribunal din a nih hunah chuan he thuchheremna kaltlanga an relte chu Supreme Court chiahin a thiatin, a ngaihtuah thei tawh dawn a ni.
Chuti ang bilh telna bill pass mai tur chungchang chu Indian Weightlifting Federation president Sahdev Yadav pawhin fak vakin, “Bill ropui tak a ni a, 2036 Olympics tinzawna PM vision a ni. Federation huang chhunga legal case awm thin pawh a titlem dawn a, sports pawh a tluang zuih tawh ang a, court inbeihnaa sum kalral hum hum thin pawh kan hum thei tawh ang.”
Athletics Federation of India spokesperson Adille Sumariwalla chuan policy duan thar chu ‘tun maia mamawh nghal’ tia sawi chungin, “He dan thar hian National Sports Federation inkaihhruaina tha zawk a hringchhuak dawn a; tun dinhmunah NSF zawng zawng deuh thaw hi court case-in a chimbuai kan ni a; court lamah inthlan thubuai kan nei reng a, court tam tak lah hian sports chungchangah ngaihdan an nei hniam ropui bawk si a; thu inang rengah court hrang hrang thutlukna siam dante lah a danglam zeng zung a, chu chuan thil a tichichawm zo a; BCCI, IOA, AIFF tihte’n rorelna hrang thliah thliah an kalpuite hi a buaithlak em em a ni.
“Tunacourt case let remrumte hi federation lamin an hnukkir tawh ang a, National Sports Tribunal chuan angkhata hrutin, an thutlukna chu Supreme Court bakin a chai zui a rem tawh lo ang a, he bill hi pass lo se chuan Indian sport tan hi chuan chhiatna a ni kumkhua mai dawn a ni.
“A tawpa tawpah chuan rorelna fel, policy dik zulzuiin ke kan pen thei tawh dawn a; a tum tha ringawt mah se bawhzuina fel leh tha awm lo chuan engmah a ni lo thin a, vawiinah chuan mite hian system awmchhunte pawh an tibawrhbang zo a, hei hi a chhan chu Sports Code emaw Bill/Act kan la neih loh vang a ni,” tiin dan thar a nghahhlelhzia a sawichhuak.
Badminton Association of India secretary Sanjay Mishra pawhin an bill pass tur thatna sawiin, langtlang a nihna ngawt pawh chu thlakhlelhawm tiin a fak.
Swimming Federation of India secretary Monal Chokshi chuan National Sports Code 2011 leh a hnu lama court thuremna hrang hrangte chuan thil a tibuaichuar zo a, tun dinhmunah chuan engmah hi chiang tak tak awm loin a black and white rih niin a sawi ve bawk.
Hockey India president Dilip Tirkey chuan bill pass tura chhawpchhuah a ni tur chu ni chhinchhiahtlak tia sawiin, India ram sports khawvel chu a felfaiin, a chiang kuar tawh dawn a, federation din chhan leh tum berte pawh infiammite tinzawn (athlete-centred) a nih tawh tur thu sawiin, dante pawh langtlanga duan niin, he siamthatna inmung mek hian infiammite leh sum dahtu (stakeholder)-te chu rinngamnain a thuam thar tawh dawn a, khawvel standard an zui ve tawh dawn niin a sawi.
Table Tennis Federation of India secretary general Kamlesh Mehta pawhin ‘kawng dik hawi zawnga hmasawnna lian’ tia sawiin, “He bill thuken leh bill pass tumna hi sawrkarin level thara Indian sport hlankai a tumzia pholangtu niin, bill hian infiamna huang chhunga thu inhmu lo a chingfel zung zung tawh tur ringawt pawh hi a nghahhlelhawm tawh,” a ti ve bawk.