Lalhmangaiha Sailo
Holy Cross Bakery
9436360275
-- Advertisement --
An hotupa a nia lawm min ti an awm pawhin a awm tho e, Politics a ni emaw a ni lo emaw tu pawh fak phute chu fak ila, sawiselawm te pawh sawisel zel i la, siamthatna tur atan chuan a pawi lo e.
Kum chanve dawn a lo ni reng tawh mai, kan Sawrkhar thar ZPM Sawrkhar kalphung thar mipui Sawrkhar Bana kaih tih te hi engtin chuan kan hotute hian hma an han la dawn ni maw tiin ka lo thlir ve ran mai a. Kan Chief Minister berin Raj Bhavan Circular lawn hmuna lakluh an nih tum khan, mahni in lama lawmpuitu thiantha, thenawm khawveng lo nghak thup te pawh tlan pel a, Chhanchhuahna Camp |awngtai Bethel Camping Centre, Lungverh a pan ding nghal a, a zuk tlawh hmasa ber te kha, Ram rorelna ah Pathian ram lo thleng rawh se tih thu a ngaih pawimawhzia a ti lang kha a ropui e.
Heng a hnuaia kan tarlan te hi kan sawi thin a, kan la sawi tam tawk lo mah mah lo maw!!!
1) Hun rei lo te chhunga Health Care Scheme hnuaia damlote senso bill Health Care bill tang thup mai damlo thenkhatte phei chuan la hman lo va, an thihsan tak an han chingfel duak mai te.
2) Sawrkhar leiba tamtak an han tlak duak thei te leh
3) Sawrkhar hnathawkte hlawh leh pension hlawh, thla chanve hnu lama la thin ten a hun taka thla thar tira an han la ve ta te.
4) Tar pension a let dawna an han tihpun sak thei mai te hi. Hengte hi ZPM kalphung thar Sawrkhar hnathawh chu a ni mai lo maw.
Heng bakah Department hrang hrang ten, kalphung hlui her danglama hma an lakna te sawi tur a va tam em!!!
Sawrkhar hmasa hun laia Agri Minister in TELHAWNG FARM a buaipui viau leh Supply Minister in CHAKAI FARM an buaipui viau ang te kha buaipui leh sawizui pui lo va, thawktute rawn chung zela kut hnathawktute chawk phur leh hamthatna tur zawnga hma an han la chho tan te hi a thlamuan thlak khawp mai le!!
Tun tuma Supply Minister in ngun taka ngaihtuahna hmang leh Rawn tur awm te rawn chung zel a, CARD VAR siama Buhfai man tih danglam an tum te hi thenkhat in namen lova an sawisel laiin a that zawk tur thu chiangkuang taka hrilhfiah zel a nih bakah, Sawrkhar hmasa Sawrkhar chak tak a Supply Minister Pu K Sangthuama ngei pawhin hei hi chu a that zawk tur thu a rawn sawi chhuak hian a hrechiang thawkhat viau ni tur a ni. Sawisel mai lovin intawiawm zui zel zawk ila, chu chu kalphung thar hmalak tur dan tik tak pawh a ni.
Tun hnaia kan Chief Minister hmalaknate hi a va ropui em!! Keini ang veng kilkhawr deuha awm tan leh rualpawl vak lo tan chuan MHIP Golden Jubilee bial lamah hman puiin a thang mek em ni chu aw!! Kan lo tih mek laiin Delhi tlangah Prime Minister hmuin zing thingpui te an lo zuk in dun reng chu lo ni in. Kan zohnahthlak unaute Bom ho nge? Bangladesh lam atanga nunau thlaphang mangang himna zawnga min rawn bel lawm lawmtute hmangaihna leh lainatna nei miah lo va BSF Police ten an nawr let nawk nawk a ni tih thu an hriat chuan awm hle hle thei lovin, huaisen leh pa taka tawngchhuakin “hei hi chu ka mawh a ni” tiin tumah pawh rawn lovin Prime Minister hmu turin Delhi a pan zui a.
Prime Minister leh Minister pawimawh deuhte chu an chenna inah hmuin “heng kan unau, raltlan mangang te an sahimna zawnga min rawn beltute hi ka thawnlet dawn lo” a’n ti tawp mai hi a va thlamuanthlakin hotu nih a va tling riap riap tak em!! Chu mai a ni lo, anmahni nel tak leh zah takin kan Zoram thlai thar, thei, Rawtuai, Sapthei leh Dragon Fruit thlengin puar nawlh tham thar tem nachang zuk hria a mawle!! Thil hi a hlu emaw hlu lo emaw lam ni lovin duhsak taka kan han inpekte hi a lawmawm a, inhriatzuina atan pawh a tha khawpin kan hotute vai putar ho pawh an lawm khawp ang le.
India ram Sipai lalber General Upenda Dwivedi in khual tha thlena zanriah ei tura a lo sawm tak te a lawmawmin a va ropui em!! Zoram hmasawnna tur leh kum rei tak Aizawl hmun laili laia Assam Rifles sawn chhuah tur chungchang thleng hian mumal takin an sawiho turah ngai ila, Mizo Scout Battn din chungchang te, Sainik sikul thlenga an sawi ho te hian rah tha a thlen i beisei ang u.
Engpawh nise Zoram mipui tlemte tlangram boruak tha leh thengthaw taka cheng ten kan mamawh Buh leh Bal Thlai chi hrang hrang eng hunlai pawh a kan chin theihna ram hi, kan pi leh pu Sailo Lal ten huaisen taka Syhlet leh Ghaziabad Jail thim thlenga thih chilhtute leh thih huama an lo beih leh an lo humhim hi keini thangthar fing leh hmanraw tha leh mithiam awm tawh te hi chuan Zoram thar i siam teh ang u.
Khawvel Indopui pahnih hnu a Japan, South Korea te tunhnaia Vietnam, Taiwan leh Thailand ramte an vawiin dinhmun anga an dinna a la rei lo. Ram hi huaisen taka hruaitu, mi tha, mahni hmasial lo leh corrupt lo ten an hruai chuan, hun rei lo te chhungin hmuh theihin a lo danglam mai thin a ni tih heng Ram atangte hian a hriat theih mai awm e. Chutiangah chuan mipuite an hlimin hma an sawn thin. Hawh u, fak phu te chu chawimawia fakin finchhuah leh zilh ngaite chu hrilh zelin rinawm leh taima taka thawk tur leh an thahrui ti chak chung zelin ZORAM THAR-KALPHUNG THAR, MIPUI SAWRKHAR-i siam ang u.