Heroin Hawng 400

Central YMA hnuaia ruihhlo do pawl Central Anti Drugs Squad chuan nimin khan ruihhlo No 4 Hawng 400 (Kg 4 leh Gram 821) an man a, ruihhlo phurtu mi pahnih man an ni a, ruihhlo neitu ber Lalhmingmawia, Ngur Khua, Champhai District erawh Myanmar lamah a tlanchhia a ni awm e.
Lirthei khalhtute an inpuan dan chuan, a hmain ruihhlo hi tum hnih an lo phur tawh a, a vawi khatnaah Hawng 100 ve ve phurin, a vawin hnihnaah Hawng 200 ve ve an phur leh a. Ruihhlo phurtute hian Vairengte daia hnamdang (Vai) hnenah Rs. 80,000/- ve ve hlawha hlan tura inbe fel an nih thu an sawi bawk.
Ruihhlo tam tham tak manchhuah a nih tawh rual hian, man chhuah loh vir vel hi tam tham tak Mizoram chhungah hian a awm dawn tih a lang reng mai.
Tun hnaiah, Heroin Hawng 440 man avangin khawtlang buaina a lo thleng tawh bawk a. Kumin thla 4 lek kan la hmang chung hian ruihhlo man chhuah a tam tham ta hle. Tun hnai kum hnih khat vel kalta atanga heti taka ruihhlo tam tham takin kan ram a rawn paltlang tak chhen chhan hi kan thenawm Manipur buai tak avanga ruihhlo tawlhru thinte an rawn insawn vang nia ngaih loh theih a ni lo. Tunah chuan Mizoram hi Drug Transportation Corridor lian tak a chang mek a, hei hi Narcotics Control Bureau (NCB) lam pawhin an rawn vei hle a, tun hnaiah pawh NCB Director General Anurag Garg chuan chief minister rawn hmuin Mizoram chu zonal office thuthmun atan a rawn rawt a, tunah hian an insingsa mek nia hriat a ni.
Ruihhlo do tur hian mipui hi kan tanrual a ngai takzet tawh a. Heti renga ruihhlo tawlhrutute an huangtau chho zel a nih chuan, kan state-ah hian ruihhlo engemaw zat chu an thlauh lo thei lova, chu chu kan thalaite suat zeltu tur tih a chiang.
|anrual han tih hian, ruihhlo ngawr ngawr doa duty-a vei suau suau lam a ni ber lo a. Tuna naupang leh thalai lo thang lian chho mekte hian drug an khawih ve lohna tura kawng hrang hranga tihtakzeta hma kan lak a, beihpui kan thlak a ngai. Chutianga hma kan lak that theih pawh chuan, demand a tlem ang a, local supply hi chu a zuai ve maiin a rinawm. |anrual hi chakna a ni tih kan hriat bel viau tawh kha.