HIV/AIDS lama Nagaland sawrkar hmalak dan zir dawn

UNAIDS, Young Women’s Christian Association leh Mizoram State AIDS Control Society tangho hmalakna in kohhran hrang hrang aiawhten HIV/AIDS chungchanga Nagaland sawrkar leh kohhran hmalak dan zirchiangin Nilaini khan Kohima an tlawh.
Nagaland Baptist Church Council (NBCC) leh Nagaland SACS bultumin HIV/AIDS chungchanga an state sawrkar leh kohhran hmalak dan hi zir leh sawi ho a ni a. NBCC general secretary Rev Dr Zelhou Keyho kaihhruai thutkhawmah hian Legislative Forum on AIDS Nagland-a an hruaitu pahnih Dr Vinito L Chishi leh Hukatoli ten thu an sawi a. NSACS aiawhten hun an hmang bawk.
Mizoram atanga palaite hi YWCA of Aizawl consultant Zorammawii Ralte leh MSACS asst. director (Prevention) Dr Lalruatsangi ten an ho a ni.
Mizorama kohhran hrang hrang atangin Presbyterian Kohhran aiawhin Dr Lalchhanhima Ralte, Baptist Church of Mizoram aiawhin Lalhmunsiama Pautu, UPC North East India aiawhin Rev. Jh Zahluna, The Salvation Army aiawhin George Zonunsanga, Roman Catholic Diocese aiawhin Francis Lalhmingsanga leh Seventh Day Adventist atangin Pastor R. Lalramnghaka te an kal a ni.
YWCA of Aizawl leh MSACS hmalaknain, kohhran tinin an hman tangkai theih tur ‘training module’ buatsaih mek a ni a. He exposure trip-ah hian Nagaland Kohhran-ten HIV/AIDS chungchanga training module an buatsaih dan leh kaihhruaina bu te zirchian a ni.