Daily Newspaper

HLA PHUAHTU

16

Zoremi Hmar Zote

Siamtu them thiamzia hi chu sawi
vak ngaiin a lang lo a, a lo famkim telzia leh, a thil siam mihringte-a thil thleng tur a duan kimzia erawh ngaihtuah tham fê a awm niin a lang. Mi hrang hrang hei zozai zingah talent hrang hrang a’n bel darh thiam em em maite hi mihring nih tihlutu, kan vanneihna leh thil siam zinga tha bik, chungnung bika duan kan nihzia lanna a ni.

Thiam hrang hrang kan nei a, inang lo leh inpersan tak tak, a neitu tan mai ni lo, midang tan pawha hlu em em, kan inmamawh tawnna tur thil vek an ni. =henkhatin puan an tah thiam a, a thenin in an sa thiam a. A then chuan puan thui te thiamin, in chhung bungraw siam thiam te, a nihliap chhe siam atanga pheikhawk siam thlengin kan kim ve hle a ni a, thu thiam kan han tih te awmin, thenkhat chu an rilru-a awm ang pawh sawi chhuak mawihnai hlei thei lo, sawi kim hlei thei lo an nih laiin, suangtuahna mai pawh mawi leh duhawm taka sawi/ziak chhuak thiam te, mita hmuh inang theuh theuh pawh ngaihnawm taka chhuah thiam bik an awm leh a.

Kan lunglen hnêm tur te, kan intihhlim na’n leh kan nuna pawimawh em em mai chu rimawi hi a ni a, zâi thiam an awm a, an hla sak tur lo phuahtu an awm bawk a. He mite pahnih hi then hran ngaihna awm miah lova pawimawh, inhne tlat mai leh in-unau tlat an ni e ti ila kan sawi sual lo tawp ang! Zài thiamna hi thil thlâwn pêk hlu tak, a duh apiangin kan neih ve theih si loh talent ropui tak a ni a. Chutih rualin lunglênnain a hrin chhuah, hla chham mi phuah thiam te, a saka sak chi hla phuah thiamte hi zaithiam ang bawka a duh apiang tih theih, a phûr phûr zuam ngawt chi ni miah lo ve tho a ni; thu ziak te pawh.

Thiamna hrang hrang kan dawnte chu ei zawn nan, kan ni tin mamawh phuhru tur leh mihring khawsak phunga kan mamawh tinreng neih na’n kan hmang theuh hlawm a. Kawr pakhat thui man ngawt pawh cheng zanga aia tlâwm a vâng ta a, lu khat meh man pawh chêng sawmsarih niin, pheikhawk hnuai kâu chàr mai pawhin man fel tak a nei thlap mai.

Pathian thil thlâwn pêk, talent hrang hrang kan dawnte chu ‘Nang, i talent dawn hi a tha-in a ropui em mai, chumi khami chu min lo tihsak ve teh’ tiin, a thlâwna tirh kan tum miah lo ti rawh u? Puan thui a thiam em mai a, kawr ka’n thuitir ve teh ang kan tih khan kan rilru-ah thui man tur kan hisâp tel ngei ngei a. In chhung bungraw siam thiam hnenah dawhkan mawi tak mai siam tura rawih kan duh rilruk rual khan thing man tur te, a siamtu siam man tur te kan chhût nghal a, kan tlin ang tawkin kan order mai thin a ni. Kan sam rawng thlâk tur mai mai hnenah pawh a sâng têl sên a tul tih hriain, pawisa kan neih loh chuan kan ko/pan ngai lo a ni a.
Zai thiam tel lo chuan eng programme/function mah a nuamin a hlu kim thei lo emaw tih mai turin zai thiamte hi kan tan an hlû. Thu sawi ngawr ngawr te, kan thil tih chhan ber eng emaw ngaihthlak ngawr ngawr mai te a ninawm hlauvin, a buatsaihtu ten zâi thiam an sâwm tel thin a. Thu sawi kâr lakah emaw, hun remchangah sawmin, mipui tân thâwk lâkna hun, hahdamna hun an siam thin a ni. Zai thiam chuan hla phuah thiam phuah hla a sa tlângpui a, hla phuahtu hian a talent dawn, a hla phuah man hi a dawng mumal ve em tih hi a ni, kan ngaihtuah tûl ta chu ni.

MSCS (Mizo Songs Composer Society) te chu an ding ve ngei tak na a, mipui lam hian kan la hre lutuk lo nge, dân leh dûn zam sa hmang thlapa thil tih a la awm meuh lo niin a lang. Hla phuahtu tam zawk hian an hlate chu a thlâwna zai thiam an saktir thin thu an sawi fo a. An talent hlu tak mai, a timi lo tana tih ve chiam ngaihna awm reng reng lo chu, hluki thil sem takin an sem mai mai thin tih thu ka hre zauh zauh; talent dawng theuh theuh, hun leh thâ, ngaihtuahna sêng theuh theuh, a manhla lo hle niin ka hria. An lunglen chânga hla thu mawi tak mai an han ziak thla zung zung mai te, tute emawin an chanchin atanga hla phuah tura an ngen chânga tâwi tak, kim tak si-a an han phuah chhuak mai thei te hi mak leh hlu danglam tak a ni.

Talent hrang hrang zingah nêp bik, ho bik leh awlsam bik reng reng a awm lo va, an hlutna chhût chuan an hlu em em theuh mai tih kan hriat tawh kha. Hla rau rauah pawh, fam ngaih hlate phei chuan hun leh thâ mai bakah, mittui a chhawm tel ngei ngei a. tap hnapin, chaw ei pawh tui mang lovin leh, zân mut thlenga harsa khawpin a phuahtuin hun a hmang a, taksa a heh bik em em mai. A boruaka chènpui loh chuan hla lungkuai leh rilru dek tak mai a phuah theih miah si loh va, chènpui a, han liluh tak tak chuan a tuar vetu ang maiin, lungchhe vân kâiin phuah a ngai ta thin a, hei hi inhriatsak a hun ta hle.

Ka sawi duh ber chu, kan hmangaih kal ta-te pual hla kan phuahtir emaw, kan kawppuite nena kan inhmangaihna, lawmna lam hla a ni emaw, inthenna lam thu lungchhiatthlak tak emaw, kan testimony hla pawh ni se, phuah tura kan rawih/kan tirhte hah man awm tâwk vel pêk nachang hriat a hun ta khawp mai tih hi a ni. Hla phuahtu zawng zawngin a thlâwnin an phuah vek lo va, a then chuan rate fel tak an lo nei thlap bawk nâ-in, a nâwlpui hi chu kan la tîm deuh niin a hriat. MSCS lam pawhin fel takin dân an duang thlap a, kan zawm vek thei lo a nih pawhin chumi zûl zuia kal hrâm theih ni se a fel deuhin a rinawm a, hla phuahtu tân pawh a manhla deuh zawk ngei ang.

Miin hla min phuahtir hian, ‘phuah man chuti zat ka la thin a’ tih zuah zuah hi a nawm thin loh avangin zawh mai nachang hriat a tha hle awm e. Hla phuah man hi a pumpui, a thlûk leh a thu siamin chêng 5,000, a thlûk chauh siamin chêng 3,000 emaw, a thu chauh a nih chuan chêng chuti zât chu a ni e tiin rate siam sa a awm thlap a, an lâr dân leh thiam dân azira zai thiam hlawh zât a inang lo ang bawkin hla phuahtute rate hi erawh, a inang vek kher lo ve mai thei e. Thiam bik deuh te pawh an awmin ka ring. Phuahtu emaw, satu emaw, phuahtirtute inkârah vui hmûi pû leh a lian zawk chhuhsak luih ang maia kan tùm kawh vuau vuau loh nan, beng tivarah ka han sawi ve nih hi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy