Kan tunlai Zoram titi lo lampang deuh kan zoram titi tling pha tur ni si. Kan Zoram fa chuam ni mai tur a ngaih Tlumtea thlir a kan thlir mek, Aizawl FC fa chuam harsatna tamtak kar a India captain chhuanvawr a hun lai phei chuan India tan khel chunga Cristiano Ronaldo leh Messi te nen ram tan goal khung tam lam a in tlar thla thin amah pawhin a mgaihsan em em; Sunil Chhetri record Indian player zing a season khat a goal khung tam ber a nihna thai chhiat saktu Lalrinzuala chanchan ngaihnawm hi. Mizoram in I-league club kan neih chhun leh I-league champion meuh pawh lo ni tawh Aizawl FC in ram dang striker pawh lak ngai ti lo a, an rin ngam Lalrinzuala Hauhnar hi Serchhip tlangval Republic Veng, Aizawl a cheng mek a ni a, a thawhrim rah ngei sengtu harsatna in a tuk dal zawh loh chanchin thenkhat hi rawn thai lan/sawi ka duh a ni. Mizo club chuan an ti sual lo chiang e. Goal a khung mawlh mawlh a, hun harsa ata a chhanhim bawk. Mizo footballer chhuanawm tak tak dangte chu phai a khel tawh an ni fura nakina sawi zelah kan khek rih ang. Tin, kan hre thang tawh bawk.
Kum naupangte a nih lai atanga inkhelh thiam tak a ni. India club zinga in rel bawlna tha leh football ngainatute tan a ngaihven awm tak Bengaluru in 2017 chho vel a an club tan a player beisei awm zawnna (trial) an rawn neihah rawlthar mai mah la ni se in pet tling chho zelin final trial (an lak tur tih chianna) chu Punjub ah neih tur a ni a. Hetih lai a kum 16 mi tlangval tuai tir ti a chhiar theih tawng tawng kum 16 mi Rinzuala chu la bangbo tak leh thlenna tur tha pawh hmu zo lo in Sikh ho hmun thianghlim thlen in ah hmangin a pal chho mawp mawp a. He mi chinah ringawt pawh hian kan tunlai thangthar soft tak takte tan hian a entawn tlak a tling ngawt mai.
Mizo ten infiamna kan ngainat ber chu football a ni. Rinzuala chu final trial ah pawh chuan tling chho zelin Bengaluru hi I-league an khelh lai khan Aizawl ah an rawn kal thin a. India club tha hrang hrang kan lo hmu ve thei thin. An player leh staff an lak dan velte kha mumal bik riau hian ka lo hre thin. Ka lo ngaisang ru thei hle. Rinzuala’n a record a thai chhiat tak Chhetri khel ngei pawh kan lo hmuh ve theih phah bawk.|han len nan a thlan awm tak football club Bengaluru academy ah a awm lai hian a pa leh a u ten an boral san hlauh mai. Puitling tia la chhiar theih tak tak loh rawlthar tan chuan hnam hrang hrang nen a inelna karah tawrh thiam a har hle ang. Chu a chhapah Rinzuala tan vanduaina a la tawp mai lo, football players te tan a hmelma lian ti a an sawi thin. Player tamtak career titawptu khup hliam in a la tlak buak lehzel mai. Tun a record holder lo ni ta. A goal score apiang record thar ni zel mai Rinzuala hian ngaihtuah thui vawng vawng chang a ngah ve ngawt ta ve ang.
Hliam in a tihbuai footballer tamtak chawlh hlenna thlentu in tlak buak mahse a thiamna hmuh hmaih theih a ni lo. Bengaluru youth team atangin Karela club tha Gokulam a zawm zui leh a, Rinzuala chu a beidawng duh reng reng lo, a mawhphurhna a hria a, mawhphurhna a la ngam a, a nu ho in a chhung ten a hlawhtlin hun an nghak tih a hria. Mahse Gokulam Senior team inelna sang berah hmun chang tam lo in Karela league te a khel lawp lawp a Karela league ah pawh goal thun a thulh chuang lo.
Pathian pawhin mahni in tanpui a bei thinte chu a tanpui thin an ti thin. Rinzual tan pawh bultan that lehna remchang ni thei tur in Mizoram Premiere League club Chhinga Veng FC chuan Gokulam atang hian an hawh chhuak a Rinzuala tan tha tak a football khel turin kawl a eng tan dawn emaw tih laiin thim thuah hnih lo thlenna mai chauh a ni. Chhinga Veng FC tan a khel tan dawn chauh tihin hliampui bawkin a bawh buai leh ta. A club tan pawh khel hlei thei lo in inelna chawhnu lamah a lo kir thei tawk a. A khelh chhun ah erawh a khel tha hle.
Aizawl FC chuan Rinzuala thiamna lo hmuh hmaih lo in an la nghal chat mai. A club thar tan hian goal thun zui deuh mawlh mawlh in Aizawl FC chu I-league club an ni a foreigner striker kan hmu fo thin. A season khatna tual chhung league ah che tha hle mahse amah hi pum raw lian leh awm khauh tak a ni si lo a, ka mimal ngaihdan chuan a chet dan vel chu hmu mah ila Mizo striker che tha tak kan neih mang loh vangin mak ka lo ti ang reng hle.
Mak ka tihna chu mak min tih tir telh telh a Rinzuala zawng a form kher mai. Amah ngeiin min hrilh danin I-league season khatna ah I-league bikah khelh 20 ah 15 thun in he season ah hian ram hrang hrang atanga player man to tak tak team dangin an chaw lut chungin goal thun tam lamah pathumna hial a ni pha bawk. Tun kum 15 vel chhungin CR7 leh Messi ten an thun tam thei em mai a, mahni level zel hi level har ber a ni thin. League season khat a goal 15 thun chu nep lo tak a ni. I-league ah Sunil Chhetri record a khum nghal zat bawk. Indian idol record khum thei mizo tlangval. Ani phei chu Aizawlah la cheng a kan la hmuh phak hi a chhuanawm a ni. Player hlutna chhuttute chhutna ah pawh a hlut zawng 1core a ni ta hem mai.1.71cr ah a pun belh leh tawh bawk. A thawk rim a, a ti mai mai ngai lo a, goal thun thei viau e ti lo hian thiante nen a thawhho dan a thiam a, a man pawh hi a mak lo e.
A season hnihna ah erawh team angin hun duhawm tak an hman tum a ni lo a, I-league season chanve chhung chu Mizo hlanga an khelh bak ah hliam leh indaih lohna a thleng nasa hle. Rinzuala pawhin thlawpna a dawng tha tawk tih a chiang reng mai. Season hnihnaah hian a fakawmna deuh mai chu a season khatnaah kha chuan hliampui lo tuar hrep tawh a ni a, goal thun thei viau mahse an chhawr dim hle tih a hmuh theih a, hun pum a khelh loh a nei nual mai. Season hnihnaah erawh a hma aiin a rawn fit tha ta em em a ni. A thawhrim turzia min ngaihtuah tir a, a paukhauhna, a beidawn duh lohna zawng zawng kha ka ngaisang hle. Beidawnna tham chu a tawng chiang a lawm. Vai chu hming hmasa leh tawp nei thin an ni a Lalrinzuala son of Lalbiaknia tih ang hi Lalrinzuala Lalbiaknia tiin an dah thin a. Lehlamah chuan ropui takin a pa hming a la chawimawi zel hi mawi bakah a hlu dangdai ka ti khawp mai.
Season hnihna chawhnu lam ah hnam dang defender leh goalkeeper ten an rawn zawm belh chauh a, team in tlak pumpelh tum in a bei nasa hle. Season fuh tak chu kan ti thei lo ang. Heti chung hian Rinzuala chuan goal thun a thulh chuang lo goal 14 lai a thun leh zel mai. A goal thun apiang record thar a ni a, a khelhna club Aizawl FC chu I-league la khelh chhunzawm zel thei tur in a chhanhim bawk. A goal thun dan hi tarlan dan a inan loh thin avangin amah ngei ka zawt a ni. Aizawl FC tan khelh 54 ah goal 42 a thun thu min hrilh bawk. A turu khawp mai. Player tha dang Stats han en chhin teh u. Kan mizo tlangval hmabak nei eng tak turu zia in hmu ang. Tihian ka sawi ve thin, “Rinzuala chu a langsar dawn lo emaw tih pawhin a rawn score a, ball a chan tawh chuan khawi a pet tur nge tih a hre nghal thin,” tiin.
Tunah chuan india ram club lian hrang hrangte hel rawn a ni ta. Phai lam chanchinbumite phei chuan India tana khel tura an duh thu an chhuah hial thin. Mahse India kalphung hi chu a danglam a, hmel thar kan hmu mawh hle. Season tharah chuan ISL league lian leh pawisa tamnaah Rinzuala hi kan hmuh tawh ngei a rinawm a, kut tling ngei in sum thianghlim a tumruhna avangte, a thawhrim leh in sum theihna avangte, a beih fan fan na avangte in hlawh tha tak a nei tawh tur a beisei a ni. India kawr ha chunga kan hmuh ngei ka duhsakpui hle.
Rinzuala ka rawn sawi a, amah chauh lo pawh Mizo thalai mahni thawhrim rah ngei seng tamtak an awm a i ngaisang uar zel ang u. A chhe lai siam tha in a tha lai i chawimawi tel bawk ang u hmiang.
Ziaktu : Red Wheelchair
Hliamin a tihnat zawh loh record siamtu Rinzuala
Get real time updates directly on you device, subscribe now.
Prev Post