Hmahruaitu Leverkusen her sang zel

Hmahruaitu Leverkusen her sang zel
1. FC Heidenheim 1846 khelmuala point thum thawkchhuak lehin Bayer Leverkusen chuan Bundesliga table-a an hmahruaina an sawhnghet leh hret a, title chuh kawnga anmahni khing pha teuh hnaivai ber Bayern Munich-in nizan result tarlan hman lohah mualneitu Bochum an hneh lo a nih phei chuan league game khelh leh hma zawng a sang pahnih inthlauhna hi point riatah a ding thei dawn.
Heidenheim khelmuala Leverkusen chakna goal hmasa zawk hi chawlhlawk hma chiaha Jeremie Frimpong tihluh niin, ani hian season kal lai inelna hrang hrangah goal kua thunin, assist vawi 10 a nei tling tawh bawk.
Second half-a Amine Adli goal khat thawh ve leh nen mikhual team-in sihnih faiin hma an hruai zet a, minute li chiah awm tawhah Tim Kleindienst chuan Heidenheim siphurh pakhat zawk sut thenin, mualneitu team tan beiseina siamsak bawk mah se an siphurh sut zo turin hunin a daih ta lo a, Bayer Leverkusen hian point riat zetin pahnihna luahtu Bayern Munich an kalsan theih phah.
Table laihawl luahtu Heidenheim laka an hnehna sualchhuah leh nen Xabi Alonso team khan Bundesliga record ding lai nihrualpuiin, game 32 chhung an tlawm lo zawn tling ta chiah a ni.
Kum 2019 atanga 2020 chhung khan Hansi Flick-a hoin Bayern hi competitive match-ah game heti zat chhung hi tlawm nei loin an lo kal ve tawh a ni.
Kum 1996-97, 1998-99, 1999-2000, 2001-02 leh 2010-11 runners-up Leverkusen chuan an Bundesliga title hmasaber tur an hnaih hret hret a, season tawp lam boruak sangah champion lai Bayern hi an dang zo lo palh a nih loh chuan season thara Barcelona boss ni tura sawirik mek Alonso hoin history thar siam thut thei reng dinhmunah an ding.