Hmeichhe inzuar dapchhuah tum

District Health Committee Lunglei chuan Lunglei khawpui chhunga hmeichhe inzuar an awm chuan zawn chhuah a, HIV laka an him theih nan hma lak a rel.
District Health Committee hi an chairman, bawrhsap Ramdinliani hoa thukhawmin, tangkai zawk leh phuisui zawka Mobile Integrated Counseling and Test Centre (MICTC) hman dan tur rel a ni a. Lunglei khawpui chhunga hmeichhe inzuar an awm chuan zawnchhuah a, chu’ngho chu HIV/AIDS laka an him theih nana hmalak dan tur, ‘targeted interventions on female sex worker’ an sawi a ni.
District AIDS Control officer Dr K Lalhmachhuana chuan DISHA Lunglei Cluster chu district-ah MSACS hnuaia HIV/AIDS program hrang hrang surveillance leh State AIDS Control Society Programme hrang hrang a taka kalpuitu tur, District Level Monitoring ti tura din a ni tih a sawi a. DISHA Lunglei Cluster hi cluster a nihna angin Lunglei, Serchhip leh Hnahthial district a bial a. Kum 5 (2018- 2023) chhung khan he cluster-ah hian mi 37716 thisen endik atangin HIV kai 1151 hmuchhuah an ni tih a sawi.
Adolescence Education Programme (AEP) training kalpui mek leh kalpui zel dan tur pawh rel a ni a. Lunglei district-a private school hrang hranga zirtirtu pahnih zel chu ni hnih chhung training an lo pe tawh a. La chhim ve lo private school-te tan buatsaih leh tur a ni tih sawi a ni bawk.