Hmeichhe laka hleilenna pung zel Tanpuina autu sing tel awm tawh

An chunga hleilenna a thlen avanga tanpui dil hmeichhia chu a kum telin an pung zel a, kum 8 kalta chhung ngawt khan mi 17000 chuangin tanpuitu an au tawh.An chunga hleilenna a thlen avanga tanpui dil hmeichhia chu a kum telin an pung zel a, kum 8 kalta chhung ngawt khan mi 17000 chuangin tanpuitu an au tawh.
Social Welfare, Women & Child Development department chuan hmeichhe chunga hleilenna hi mumal taka helpline an kalpui hnua an chhinchhiah danin, kumtin a pung tual tual tih an sawi a. Kum 2017 atanga vawiin thlengin hmeichhe chunga hleilenna chungchangah Women Helpline Mizoram chuan mi 17221 hnen atangin report a dawng tawh. Report dawn atanga za zela 59.12 chu inchhung khura thleng niin, zaa 40.88 chu pawn lama thleng a ni, tiin Helpline administrator Dr. Jennifer Rohlupuii chuan The Aizawl Post zawhna a chhang.
Women Helpline Mizoram kaltlanga tanpuina dil thinte chu darkar 24 chhungin an buaipui nghal thin a. Case an neih dan azirin damdawi in leh police station an panpui thuai thin. Dan anga inkhin a ngaih chang pawhin hmeichhiate dikna chanvo humhalh a nih theih nan a thlawnin sawrkar ukil an rawih sak thin tih a sawi a ni.
Harsatna tawk tanpui diltute hi a tlangpuiin nupa inkar intih thiam loh vang a ni a, kum 21-40 inkar an tam ber. Pawikhawihtute hi an pasal an ni tlangpui bawk.
Naupang fahraha an siam loh nan nupa inkar chu inthen loa sawi fel hram hram an duh thin tih Dr Jennifer Rohlupuii hian sawiin, “Hetiang harsatna tawk hmeichhiate chu an tan an in lama awm a hlauhawm a nih pawhin district tinah ni 5 leh zan 5 an awm lailawkna tur, One Stop Centre a awm vek a. Chhungte belh tur mumal nei lo tan Mualmam, Thingsulthliah leh Kelsih ah awmna hmun tur siamsak an ni bawk,” a ti.
Kelhsih ami hi Zoram Drivers Union Ramthim Board enkawlna hnuaia awm a ni a. Eizawnna tlak thiamna an neih theihna turin zirtirna hrang hrang an kalpui bakah an fate thlengin an awmpui theih tih a sawi.
Women Helpline Mizoram kaltlanga tanpuina dil an dawn tam tak zingah a hmeichhia zawk thiam loh chang an awm ve nual tih Helpline administrator hian a sawi a. “Hmeichhiate background engkim uluk takin kan zirchiang thin,” a ti. Anmahni pantu zingah duhsak bik an nei loa, report an dawn hmasak apiang an buaipui thin a, ngaihpawimawh bik a awm lo tih a sawi a ni.

Kum 8 chhung Women Helpline call dawn dan :

1. 2016 – 2017 : 812
2. 2017 – 2018 : 1320
3. 2018 – 2019 : 1539
4. 2019 – 2020 : 1624
5. 2020 – 2021 : 2677
6. 2021 – 2022 : 2645
7. 2022 – 2023 : 3094
8. 2023 – 2024 : 3510
Total : 17221