Hmeichhe tihduhdah vangin Taliban hotute man dan dap

Hmeichhe tihduhdah vangin
Taliban hotute man dan dap
International Criminal Court (ICC)-a prosecutor lawk ber chuan Afghanistan-a Taliban sorkar hotu liante chu hmeichhia leh hmeichhe naupangte an tihduhdah avangin man tura thupek chhuah turin a bei dawn tih a sawi.
Karim Khan-a hian Supreme Leader Haibatullah Akhundzada leh Chief Justice Abdul Hakim Haqqani te chu mihring nihphunga nihna (gender) avanga mi palzutna avangin dan an bawhchhia niin an sawi.
ICC judge-ten he thil hi ngaihtuahin man tura thupek chhuah leh chhuah loh an tifel ang.
ICC hian mi suat, mihring nihna palzuta pawikhawih leh indonaa pawikhawihna ang chi chhuiin a titute hremna a siam thin a. Eng ram thuneitute pawh hetiang dan bawhchhe lo tura tih an ni.
Khan-a’n thuchhuah a siamah chuan heng mipa pahnihte hi ‘Afghan hmeichhe naupang leh hmeichhiate tihduhdahtu an ni tiin a tar lang a ni.
Taliban sorkar hian rawng takin ‘mi thattu hremna, lung in tan, sawisak, pawngsual leh mipat hmeichhiatna lam hawiin’ dan a bawhchhe nasa em em niin a sawi bawk.
Tihduhdahna hi August 15, 2021 atanga vawiin thlengin Afghanistan ram pumah an la kalpui niin a sawi.
Akhundzada-a hi kum 2016 khan Taliban supreme commander a ni tan a, tunah hian Islamic Emirate of Afghanistan an tihah hruaitu a ni bawk a. Kum 1980 chhovah khan Islamist pawlten Afghanistan-a Soviet sipai lutte an beihnaah nasa takin a lo tang tawh bawk.
Haqqani-a hi Taliban dintu, Mullah Omar-a nena inhnai tak niin kum 2020-a US aiawhte nena an inbiaknaah pawh khan Taliban aiawha ding a ni.
Taliban sorkar chuan ICC-in thu an chhuah hi a la chhang lo.
Taliban hian 9/11 New York khawpui beih a nih atanga kum 20 chhung US kaihhruaiin a paih thlak hnuah kum 2021 atang khan Afghanistan-ah ro an rel leh tan a; mahse, tun thlengin khawvel ram thiltitheite chuan an sorkar hi a la pawm lo.
‘Morality laws’ an tih tlawhchhanin thuneihna an chan leh hnuah hian an rama hmeichhia tam takin an dikna chanvo an chân tawh.
Afghanistan hi khawvel ram zingah hmeichhiaten secondary leh higher education an neih theih lohna awm chhun ni tawhin hmeichhe naupang maktaduai 1.5 vel sikul kai châk takin an awm mek.
Taliban hian vawi tam tak tihfel ngai tihfel a nih hnuah hmeichhiate hi sikul an kai leh an phalsak dawn tih an sawi tawh a; mahse, tun thlengin a tak a la chang thei lo.
Beauty salon pawh khar a ni a, hmeichhiate hi vantlang intihhlimna hmun, gym leh inbualnaah pawh an lan phalsak an ni lo.
An incheina pawh an taksa zawng zawng an khuh vek a ngai a, mipa an thisen zawmpui emaw, an pasal emaw tel lovin an zin thei lo bawk.
December thla khan hmeichhiate hi midwife leh nurse atana inzir an khap zui leh a, hei hi hmeichhiaten zirna an neih theih awmchhun a ni tawh a, tihtawpsak an ni leh ta a ni.