Hna thawk tha lo kawng siamtute office kharsak

Lawngtlai leh Kawlchaw inkar, National Highway 54 hna thawh mekah hmanraw tha lo hman zui zel a nih avangin he hna thawktu NHIDCL leh a hnuaia contractor office, Lawngtlai ami chu Thawhlehni khan Central Young Lai Association chuan a kharsak.
Thudawn danin, Lawngtlai leh Kawlchaw inkara NH 54 hnathawh mek chu hmanraw tha lo hman niin, hna pawh duhdah taka thawh nia hriat a ni. Central YLA hian hma la in, kumin January 8 khan NHIDCL executive director hoin an sawikhawm a, tha zawka hna an thawh tur thute, hnathawh tha lo awmte pawh thiat a, tha zawka thlak an tum thute NHIDCL lam hian an sawi a ni. Kumin July 10 thleng khan hmalakna engmah a awm loh vangin, hna tha zawka thawk turin Central YLA hian a ngen nawn a, tun thlenga hmalakna hmuh tur a awmloh vangin, Lawngtlaia NHIDCL leh an hnuaia contractor Intercontinental Consultants & Technografts Pvt. Ltd (ICT) office te hi kai rih lo turin Central YLA chuan a ti a ni.
Sum tam tak senga hmasawnna hna thawh, ram rotling hnutchhiah loa, duhdah taka thawh chu ngaihthiam chi a ni lo tih Central YLA hruaitute chuan sawiin, hna tha an duh avanga hma an lakna chu mipuiin hrethiam se an duh tih an sawi a ni.