Hnahlanah Grape Festival hmang

Hnahlan Grape Farming & Processing Coop Society (HGFPCS) Ltd leh A North East Wave (NEW) tawngdun chuan Inrinni khan Hnahlan Winery-ah SEDP sum hmanga ruahman Grape Festival ‘The Grape Escape’ an buatsaih.
He hun hmanpuitu Champhai North bialtu MLA Dr ZR Thiamsanga chuan Grape Festival chu grape chingtute leh tourism hmasawnna atana hmalakna a ni tiin, kuthnathawktute eizawnna kawngah pawh hun lokal zel turah nghawng tha tak a neih ngei a beisei tih a sawi.
He hun hmanpuitu dang Ministry of Tourism-a regional director Anil Oraw chuan The Grape Escape chu Mizorama wine industry leh tourism lama hmasawnna pawimawh tak a ni tih sawiin, Ministry of Tourism hnuaia India rama tourism hmasawnna tura project liantham Swadesh Darshan 2.0 hnuaiah Champhai district-ah wine tourism kalpui a nih tur thu leh hemi atan hian sum sanction fel a nih tawh thu a sawi.
Hnahlan Winery enkawltute sawi danin, he winery hi kum 2007 khan bul tan niin, Hnahlan leh a chhehvel khuaah hian Bangalore Blue grape variety an ching a. A tirah chuan fortified wine siam niin, tunah fermented wine – Isabella an siam a ni. Kum 2019 khan grape quintal 480, 2020 ah quintal 630, 2021 ah quintal 500, 2022 ah quintal 1500 leh 2023 ah quintal 989 leiin wine-ah an siam a. Winery-ah hian fermentation tank 22 (litre 11000 theuh) awmin, litre 242000 leng thei a ni a, grape quintal 200 lenna cold storage an nei bawk.
Grape Escape-ah hian live music, grape stomping, vineyard tour, cultural program, marathon leh program hrang hrang hman a ni.